БИШКЕК, 10-фев. — Sputnik. АКШ Европа өлкөлөрүнүн өз аскерлерин Украинанын аймагына киргизишин колдобойт. Бул тууралуу Россиянын тышкы иштер министри Сергей Лавров билдиргенин РИА новости жазды.
"Британиянын премьер-министри Кир Стармер жана Франциянын президенти Эммануэль Макрон НАТОнун башкы катчысы Марк Рютте менен бирге Украинага "экспедициялык аскерлерди" жайгаштыруу мүмкүндүгүн талкуулап, АКШ аларды аскердик жактан колдойт деп билдиришүүдө. Азыр америкалыктар менен бул маселени кандай талкуулап жатканыбызга токтолбой эле коеюн. Бирок биз алардан мунун чын-төгүнүн сурадык. Европалыктар жана Владимир Зеленский үчүн оң жооп болбойт деп ишенем", — деди Сергей Лавров.
Буга чейин Financial Times гезити жазгандай, АКШ менен Европа өлкөлөрү эгер Россия келишимдерди бузса, ага кандай жооп кайтарары боюнча алдын ала макулдашып коюшканын жазган. Керек болсо америкалык аскерлерди да колдонушу мүмкүн.
Өткөн жумада Марк Рютте Жогорку Радада сүйлөп жатып, тынчтык келишими түзүлгөндөн кийин дароо Украинада чет элдик аскерлер пайда болорун билдирген.
Январдын башында Парижде "каалоочулардын коалициясы" жогорку деңгээлдеги жолугушуу өткөрүп, анда Киев үчүн коопсуздук кепилдиктери талкууланган. Жыйынтыгында лидерлер тынчтык келишими түзүлгөн учурда украин аймагына аскерлерди жайгаштыруу жөнүндө декларацияга кол коюшкан. Стармердин айтымында, британиялыктар менен француздар Украинанын аймагында аскердик базаларды түзүп, Украина Куралдуу күчтөрү үчүн техника сактоочу кампаларды курушат.
Москва НАТОго мүчө мамлекеттердин аскерлерин Украинага жайгаштыруунун кандай гана сценарийи болбосун, таптакыр кабыл алынгыс экенин бир нече ирет билдирген. Бул аракеттерди Россия ТИМи согушту улантууга түрткү катары баалаган.