БИШКЕК, 9-фев. — Sputnik. SpaceX компаниясы алдыдагы жылдары Ай менен Марска шаар курарын америкалык ишкер Илон Маск Х соцтармагы аркылуу билдирди. Бул тууралуу РИА Новости жазды.
"SpaceX Айга өзү өнүккөн шаар курууга багыт алганын айткым келет. Муну 10 жылга жетпеген убакытта ишке ашырса болот. Компаниянын Марска да шаар салуу ниети бар, буга 5-7 жылдан кийин киришет", — деп жазды Маск.
Миллиардер Марска белгилүү бир убакытта гана, башкача айтканда, Күн системасынын планеталары бири-бирине шайкеш келгенде, 26 айда бир жолу учуп барып турууга болорун белгиледи. Анын айтымында, учуу убактысы алты айды түзөт. Ал эми Айга ар 10 күн сайын учуп, эки күндө жетүүгө болот. Мындан улам курулуш алгач Жердин жандоочусунда башталмакчы.
Масктын эсеби боюнча, Марска шаар курууга 20 жылдай убакыт кетет.