БИШКЕК, 6-фев. — Sputnik. Батышта "дүйнөлүк элита" аралашкан иштердин бири да иликтенбейт. Мындай пикири менен РФ ТИМинин өкүлү Мария Захарова өзүнүн Telegram каналынан бөлүштү.
Ал жыныстык эксплуатация үчүн адам сатууга айыпталган америкалык финансист Жеффри Эпштейндин ишине комментарий берген.
"Күн сайын өзүмдү кыйнап "Эпштейндин файлдарын" окуп жатам. Бул жөн эле тозок… Эми баары түшүнүктүү болуп калды. Кеннединин өлтүрүлүшү, "Түндүк агымдардын" жардырылышы "Эпштейндин иши" сыяктуу эле толук иликтенбей калат. Анткени Батышта дүйнөлүк элита аралашкан окуяларга көз жуумп коюу адаты бар. Баарынан да алардын кылмыштары жана кылмыштуу ниеттери сүрөт, видеого даана тартылып калса дагы билмексен болуп отурушканы күлкүнү келтирет", — деп жазды Захарова.
Эпштейндин курмандыгы болгон кыздын күндөлүгүн карап чыккан соң Захарова "эмне себептен эл аралык иликтөө жүргүзүлгөн эмес, эмне себеп менен Карл IIIнүн бир тууганы Эндрю Маунтбеттен-Виндзорго каршы кылмыш иштери ачылган жок?" деген суроону узатты. Белгилей кетсек, жакында эле ал кыздын сөөгү табылган.
Эндрю бир нече жылдан бери Эпштейн менен болгон байланышы үчүн жаңжалдан башы чыкпай келет. 2025-жылдын декабрь айында падыша бир тууганын бардык титулдарынан ажыратты. Мурда британиялык монархияга каршы чыккан Republic тобунун мүчөлөрү Букингем сарайынын алдында акция өткөрүп, Карл IIIнүн бир тууганы Эндрю Маунтбеттен-Виндзордун Эпштейн менен байланышы тууралуу бардык маалыматты жарыялоону талап кылышкан.
2019-жылы Эпштейн АКШда жыныстык эксплуатация үчүн адам сатууга айыпталып, 40 жылдан ашык мөөнөткө соттолушу мүмкүн экени айтылган. Прокуратуранын маалыматына ылайык, 2002-жылдан 2005-жылга чейин Эпштейн Нью-Йорк жана Флоридадагы резиденцияларында кабыл алган ондогон жашы жете элек кыздар менен сексуалдык мамиледе болгон. Ал кыздарга нак акча төлөп, андан кийин айрымдарына жаңы кыздарды азгырууну тапшырган. Жабырлануучулардын жашы 14төн ашкан эмес.
2019-жылдын июль айынын башында Нью-Йорктогу Манхэттен соту Эпштейнди угуп, аны камакта калтырган. Ошондой эле күрөө менен эркиндикке чыгарууга тыюу салган. Ошол эле жылдын июль айынын аягында Эпштейн абактагы камерасынан эс-учун жоготкон абалда табылган. Кийинчерээк каза болуп, тергөө ал өз жанын кыйды деген бүтүм чыгарган.
Буга чейин АКШнын башкы прокурорунун орун басары Тодд Бланш Эпштейн иши боюнча материалдарды жарыялоо аяктаганын билдирген. Файлдардын жалпы көлөмү 3,5 миллиондон ашык документти түзөт.