Министрлер кабинетинин төрагасы Адылбек Касымалиев Социалдык фонддун төрагасы Бактияр Алиевди кабыл алып, пенсиялык системаны реформалоонун негизги этабы болуп саналган фонддун жаңы автоматташтырылган маалыматтык системасы менен таанышты.Минкабдын маалыматына ылайык, автоматташтырылган система Социалдык фонддун ишин модернизациялоого жана натыйжалуулугун жогорулатууга, калкты тейлөөнүн сапатын жакшыртууга, ошондой эле маалыматтарды иштеп чыгуу убактысын кыскартууга жана коррупциялык тобокелдиктерди жоюуга өбөлгө түзөт. "Система пенсияны жол-жоболоштуруу процессин кыйла жөнөкөйлөтүп, жарандарды кагаз түрүндөгү документтерди чогултуудан бошотот. Керектүү маалыматты автоматтык түрдө чогултуп, жарандардын арыздарын кароо убактысын кыскартат. Мындан тышкары, система жеке маалыматтарды жогорку деңгээлде коргоону камсыздап, ар кандай киберкоркунучтарга туруштук бере алат", — деп айтылат маалыматта. Касымалиев фонддун ишмердүүлүгүндө реформаларды ырааттуу жүргүзүүнүн маанилүүлүгүн белгилеп, ведомствонун артыкчылыктуу багыты пенсионерлер үчүн жагымдуу шарттарды түзүү болуп саналарын белгиледи.
Жогорку Кеңеште мамлекеттик Гимндин жаңы текстин тандоо боюнча депутаттардан турган комиссия түзүлдү. Ага депутаттар Нуржамал Төрөбекова, Бактыяр Калпаев, Венера Салямова, Камила Талиева жана Улан Жаанбаев кирди. Төрага комиссия гимндин жаңы текстин 1-июнга чейин тандашы керектигин, жетишпесе сентябрга чейин да узартып койсо болорун айтты.
Соңку беш жыл ичинде мамлекетке 352 миллиард сом кайтарылды. Бул тууралуу УКМК билдирди. Башкармалыкта ыкчам иштердин 2025-жылга карата жыйынтыгын кароо боюнча коллегия өткөн. "Антикоррупциялык чаралар жана ыкчам-иликтөө иштеринин натыйжасында соңку беш жылда мамлекетке 352 миллиард сомду түзгөн каржылык активдер, мамлекеттик мүлк объектилери, жер тилкелер жана башка материалдык баалуулуктар түрүндө кайтарылган", — деп маалымдайт УКМК. Бардык кайтарылган каражаттар президенттин Турукташтыруу фондунун атайын эсебине берилет. Мамлекет башчынын жеке буйругу менен аларды социалдык долбоорлорду ишке ашыруу, инфраструктураны өнүктүрүү жана жарандардын жашоо деңгээлин жакшыртууга багыттайт. Эскерте кетсек, жогорудагы сумма курстун өзгөрүшү менен көрсөтүлгөн.
Германиянын канцлери Фридрих Мерц Украинанын Евробиримдикке тез арада киришин четке какты. Бул туурасында РИА Новости кабарлады. "Ал 2027-жылдын 1-январында ЕБге кирет деген нерсе такыр мүмкүн эмес", — деп канцлер Германиядагы саясий ири партиянын лидерлери менен сүйлөшкөн соң билдирген. Мерцтин айтымында, ЕБдин курамына кирүүнү каалаган ар бир мамлекет алгач Копенгагендин критейирлерине жооп бериши керек. Бул процесске адатта бир нече жыл кетет.Белгилей кетсек, буга чейин Владимир Зеленский Украинаны 2027-жылга чейин кабыл алууну ЕБден талап кылган. Ал "согуштун соңуна чыгышы боюнча" келишимде "так дата" айтылышы керек деген шарт койгон.