БИШКЕК, 27-янв. — Sputnik. Чүй облусунда кичи ГЭСти курууда кызматкерлерине маяна төлөбөгөн жетекчи кармалды. Бул тууралуу облустук милициядан билдиришти.
Маалыматка ылайык, жергиликтүү тургун милицияга жамааттык арыз менен кайрылып, анда 2024-жылдын октябрь айынан тартып Г.А. аттуу жаран Ак-Суу капчыгайындагы кичи ГЭСтин курулушунда бетон иштерине 25–30 кишини тартканы айтылган. Эмгек акы 50–60 миң сомду түзгөн, бирок ал 2025-жылдын декабрь айында жумушчуларга акча төлөбөй койгон.
Аталган факт боюнча Кылмыш-жаза кодексинин 209-беренеси (“Алдамчылык”) менен кылмыш иши козголгон.
“Тергөөдө аныкталгандай, Г.А. оозеки келишим менен "А.Г.Э." компаниясынын ГЭС–1 жана ГЭС–2 объектилеринде субподрядчы катары бетон иштерин баштаган. Бетондун чарчы метринин баасы 5 500 сомду түзгөн, ишке болжол менен 100 жергиликтүү тургун тартылып, саатына 200 сомдон төлөнмөй болгон. Бирок 2025-жылдын ноябрынан 8-декабрга чейин маяна берилген эмес”, — деп билдиришти милициядан.
Белгиленген мезгилде жасалган бетон ишинин көлөмү 7 200 чарчы метрди түзгөн, ошондой эле башка иштер да аткарылган. Белгилүү болгондой, Г.А. субподрядчы компаниядан 43,4 миллион сом алган.
Шектүү убактылуу кармоочу жайга киргизилип, тергөө иштери улантылууда.