Акыркы мезгилде тигүү тармагына олуттуу таасир эткен дагы бир маанилүү фактор — Россия Федерациясы импорттолгон товарлардын мыйзамдуу жол менен киришин талап кылууда. Белгилүү болгондой, буга чейин тигүү тармагындагы продукциянын болжол менен 70 пайызга жакыны көмүскө жолдор менен экспорттолуп келген. Бул көрүнүш ишкерлер үчүн кыска мөөнөттө ыңгайлуу болгону менен, тармактын системалуу өнүгүшүнө тоскоолдук жаратып келген.
Учурда Россия тараптан бардык товарлар расмий жол менен, кошумча нарк салыгын (НДС) толук төлөө аркылуу гана киргизилиши керек деген талап коюлууда. Натыйжада тигүүчүлөр үчүн өндүрүштүн жана экспорттун өздүк наркы өсүп, айрыкча чакан жана орто цехтер үчүн олуттуу каржылык жүк жаралууда. Көптөгөн ишкерлер бухгалтердик эсеп, документ жүгүртүү жана салыктык милдеттенмелерге даяр эместигин айтып чыгышууда.
Ошол эле учурда бул талаптар узак мөөнөттүү келечекте тармакты “ачыкка чыгарууга”, атаандаштыкты тең шартта жүргүзүүгө жана ишкерлердин мыйзамдуу иш алып баруусуна шарт түзөрү белгиленет. Мамлекеттик органдар тигүүчүлөрдү көмүскө экономикадан чыгаруу үчүн түшүндүрүү иштерин жүргүзүп, салыктык жана административдик жүктү этап-этабы менен жеңилдетүү мүмкүнчүлүктөрүн караштырууда.