БИШКЕК, 14-янв. — Sputnik. Бүгүнкү күндө балдар арасындагы кадимки уруш-талаш менен буллингди чаташтырган учурлар көп. Чынында пикир келишпестик буллинг болуп эсептелбейт. Бул тууралуу балдар психологу Айнек Муратбекова Sputnik Кыргызстан радиосунун эфиринде маек куруп жатып билдирди.
Анын айтымында, буллинг узакка созулуп, туруктуу мүнөзгө ээ. Деген менен бири-бири менен тыгыз байланышта болгон процесстер. Буллингде зомбулуктун ар кандай түрлөрү системалуу түрдө кайталанып, эки эле окуучуну эмес, бүтүндөй классты камтыйт.
"Буллингде бир окуучу агрессор, экинчиси жабырлануучу болсо, калгандары активдүү же пассивдүү байкоочу катары катышат. Алар агрессорду колдошу же токтотушу мүмкүн. Буллингдин негизги белгиси — узакка созулушу жана бир тараптуу зомбулуктун кайталанышы. Ал эми кадимки урушта тараптардын позициясы тең болот, экөө тең эмоцияга алдырып, бирок басмырлоо, мазактоо же коркутуу максаты болбойт. Мына ушуну айырмалай билишибиз керек. Бүгүнкү күндө мектептерде кибербуллинг, психологиялык басым жана моббинг (коллективдеги бир адамды бөлүп, баарылап басмырлоо) күч алууда. Бир окуучуга каршы чакан топ же бүтүндөй класс биригип жасаган зомбулук буллинг болот. Мындай көрүнүш айлап, атүгүл жылдап уланышы мүмкүн. Көйгөй менен күрөшүүдө ата-энелер балдарына эмоционалдык колдоо көрсөтүп, мугалимдер окуучулардын ортосундагы мамилеге өз убагында кийлигишип, коопсуз билим берүү чөйрөсүн түзүшү зарыл", — деди Муратбекова.
Ал ошондой эле учурда окуучулар денеге залал келтирбестен, сыртынан байкалбаган психологиялык зомбулуктун түрлөрүн көбүрөөк тандап жатышканын кошумчалады.