БИШКЕК, 2-янв. — Sputnik. "Майлуу-Суу лампа заводу" ачык акционердик коомунун кызматкерлеринин айлыгы январдын аягына чейин толук төлөнөт. Бул тууралуу министрлер кабинетинин төрагасынын орун басары Бакыт Төрөбаев бүгүн, 2-январда, Жалал-Абадда заводдун жумушчулары менен жолукканда айтты.
Ал заводдун ишин жандандыруу үчүн атайын жумушчу топ түзүлөрүн, өндүрүштүн кирешесин арттыруу, иш багыттарды көбөйтүү боюнча талдоо жүргүзүлөрүн кошумчалады. Учурда лампаларды (LED эмес, кадимки түрү) жасоо токтотуларын белгиледи.
Эске салсак, буга чейин заводдун 550 кызматкери маянасы сакталбаган шартта убактылуу эмгек өргүүгө чыгары маалым болгон. Өргүү заводго инвестор табылып, өндүрүш иши толук жанданганга чейин созуларын билдиришкен. Мындан тышкары, өз каалоосу менен жумуштан кетүүнү каалагандарга мыйзам чегинде тиешелүү кенемте төлөнөрү айтылган.