БИШКЕК, 31-дек. — Sputnik. Россиянын Аскердик-аба күчтөрү президент Владимир Путиндин резиденциясына жасалган чабуулдун чоо-жайын ачыктады. Бул тууралуу Аскердик-аба жана космос күчтөрүнүн зениттик ракета аскерлеринин башчысы, генерал-майор Александр Романенков билдиргенин РИА Новости жазды.
Анын айтымында, чабуул алдын ала кылдат пландалган. Романенков билдиргендей, чабуул фактысы 28-декабрда Москва убактысы боюнча саат 19:20лар чамасында аныкталган. Учкучсуз учуучу аппараттар Украинанын Сумы жана Чернигов облустарынан учурулган.
Романенков Россиянын аскер кызматкерлери так уюшкандыкта, жогорку кесипкөйлүк менен жана натыйжалуу аракет кылышканын баса белгиледи.
Эске салсак, Киев режими 29-декабрга караган түнү Новгород облусундагы Путиндин резиденциясына каршы террордук чабуул жасап, 91 учкучсуз аппаратты колдонгон. Абадан коргонуу күчтөрү алардын баарын жок кылган. Андан кийин Россиянын тышкы иштер министри Сергей Лавров Москва Украина боюнча сүйлөшүүлөрдөгү позициясын кайра карап чыгарын билдирген.
Кремлдин өкүлү Дмитрий Песков белгилегендей, мындай чагымдар Киев тарабынан АКШнын лидери Дональд Трамптын аракеттерин алсыратууга багытталган. Бирок бул Россия менен АКШнын ортосундагы диалогго таасир этпей турганын белгилеген. Песков ошондой эле аскерлер Украина тараптан жасалган чабуулга кантип качан жана эмне менен жооп берүүнү жакшы билишерин кошумчалаган.
Ал эми АКШ лидери чабуул тууралуу укканда "абдан ачууланганын" билдирген.