БИШКЕК, 29-дек. — Sputnik. АКШ президенти Дональд Трамп Флоридада Киев режиминин башчысы Владимир Зеленский менен жолукту. РИА Новости тараптардын сүйлөшүүсүнөн соң биргелешип жасаган билдирүүлөрүнүн негизинде урунттуу учурларды тизмектеди.
Эскерте кетсек, Трамп Зеленскийди кабыл алар алдында РФ президенти Владимир Путин менен телефондон бир сааттан ашык убакыт сүйлөшкөн. Баарлашуунун жыйынтыгын АКШ лидери абдан жакшы деп баалады.
Трамптын Зеленский менен жолуккандан кийинки айткандары:
Зеленский менен жолугушуу жакшы деңгээлде өттү, ал эми Путин менен сүйлөшүү абдан жакшы болду;
украин жаңжалын токтотууда тараптар бир топ алдыга жылды;
абалды жөнгө салууга байланышкан маселелердин 95%ы макулдашылды;
согуш жүргөн аймактардын маселеси чечиле элек, бирок жылыш бар;
Украина жакынкы айларда башка аймактарынан да кол жуушу мүмкүн, ошондуктан келишимге эртерээк макул болушу керек;
Зеленский менен сүйлөшүү бүгүн да уланат.
Киев режиминин башчысы эмнелерге токтолду:
тынчтык келишиминин айрым пунктулары боюнча референдум өтүшү ыктымал;
АКШ менен Украинанын ортосундагы коопсуздук кепилдиктери боюнча маселе толук чечилди;
жакынкы апталарда абалды жөнгө салуу маселелерин аягына чыгаруу үчүн өкүлдөр кайрадан жолугушат;
Украина делегациясын өлкөнүн Улуттук коопсуздук жана коргонуу кеңешинин башчысы Рустем Умеров жетектеп, курамында тышкы иштер министринин орун басары Сергей Кислица жана Генералдык штабдын башчысы Андрей Гнатов болот.
АКШ сунуштаган тынчтык планы
Декабрдын башында Владимир Путин Кремлде АКШ президентинин атайын чабарманы Стив Уиткофф менен күйөө баласы Жаред Кушнерди кабыл алган. Тараптар тынчтык планын талкуулап, бирок мунасага келе алышкан эмес.
Кийинчерээк Путин Вашингтон 27 бөлүктөн турган планды төрт пакетке бөлүп, ар бирин өзүнчө талкуулоону сунуштаганын айткан. РФ лидери баарын дыкат карап чыкканын, анда Москва макул боло албай турган да жерлер бар экенин белгилеген.
Андан көп өтпөй Берлинде АКШ менен Украина делегациялары жолуккан. Натыйжада батыш мамлекеттери НАТО уставынын бешинчи беренесине ылайык коопсуздук кепилдигин берүүгө макул болушканы кабарланган болчу. Анын ордуна америкалыктар Киевден аймактардан баш тартууну талап кылганын Польшанын премьер-министри Дональд Туск билдирген.