ИИМ дүйшөмбүдөн тарта массалык рейд жүргүзөт.Кыргызстанда гонконг деп аталган грипп күч алууда. Кабмин Россия–Кыргыз өнүктүрүү фонду боюнча келишимди колдонуу протоколун бекитти Кыргыз Республикасынын Министрлер кабинети Россия–Кыргыз өнүктүрүү фонду жөнүндө макулдашуунун 6-беренесин колдонуу боюнча протоколду бекитти. Тиешелүү токтом ички мамлекеттик жол-жоболорду аткаруунун алкагында кабыл алынды. Сөз 2025-жылдын 7-ноябрында Бишкек шаарында кол коюлган Кыргыз Республикасынын Министрлер кабинети менен Россия Федерациясынын Өкмөтүнүн ортосундагы протокол тууралуу болуп жатат. Документ 2014-жылдын 24-ноябрында түзүлгөн Россия–Кыргыз өнүктүрүү фондунун ишмердүүлүгү жөнүндө келишимди ишке ашырууга тиешелүү. Тышкы иштер министрлигине протокол күчүнө кириши үчүн зарыл болгон бардык ички мамлекеттик жол-жоболор аяктагандыгы тууралуу Россия тарапка расмий билдирүү жөнөтүү тапшырылды. Ошондой эле токтом менен 2014–2017-жылдар аралыгында фонд тарабынан төлөнгөн мамлекеттик социалдык камсыздандыруу боюнча камсыздандыруу төгүмдөрү ыктыярдуу мүнөздө экени жана кайтарылбай турганы белгиленди. Документ жети күндөн кийин күчүнө кирет.
ИИМ 29-декабрдан тарта өлкөдө массалык рейддер өтөрүн билдирди. Тартип сакчылар жаңы жылдык майрамда массалык иш-чаралардын көбөйүшүнөн улам күчөтүлгөн тартипте кызмат өтөөгө өтөт. Узакка созулган жаңы жылдык каникулда милиция “Арсенал”, “Пиротехника”, “Анти-рэкет”, “Кароосуз калгандар”, “Кайырчы”, “Издөө”, “Тоноочу”, “Ууру”, “Өспүрүм түн” жана башка рейддерди жүргүзөт.
Кыргызстанда гонконг деп аталган грипп күч алууда. Дарыгер, инфекционист Дамирхан Чыныева бизге оорунун кесепети тууралуу маалымат берди. Анын айтымында, жогорку дене табына кургак жөтөл кошулуп, тамак кычышат. Эгерде дене табы үч күн бою көтөрүлүп, жөтөл күчөп, дем кысылса, илдет өтүшүп баратканынан кабар берет. Оору дем алуу жан жүрөк - кан тамыр системаларын жабыркатат. "Өзгөчө нерв системасына залал тиет. Балдар температурадан улам тырышып калышы мүмкүн. Өз алдынча дарыланганда оору бат өрчүп, үчүнчү эле күнү оор пневмонияга өтүшүп кетиши мүмкүн. Грипптин бул түрү өпкөгө аябай кооптуу. Анын токсиндери жүрөк менен бөйрөктү талкалап, оор учурларда мээнин шишигине чейин алып барат", - деди дарыгер.
АКШ президенти Дональд Трамп жекшемби күнү Флорида штатында боло турчу Владимир Зеленский менен жолугушууда макулдашууга жетишүү мүмкүнчүлүгүн жогору баалады. Бул тууралуу New York Post гезити жазганын РИА Новости билдирди. Ак үйдүн билдиришинче, америкалык лидердин иш графигине ылайык, эки тараптуу жолугушуу Палм-Бич шаарында түштөн кийин саат үчтө (Москва убактысы боюнча 23:00дө) өтөт. Буга чейин Трамп Владимир Зеленскийдин Украинадагы жаңжалды жөнгө салуу боюнча сунуштары анын макулдугусуз эч кандай мааниге ээ эместигин билдирген. Ошого карабастан, ал бул дем алыш күндөрү натыйжалуу жолугушуу өтүшү мүмкүн экенине ишеним арткан. Ошондой эле жакын арада Владимир Путин менен да сүйлөшүүнү пландап жатканын кошумчалаган. Россиянын Тышкы иштер министринин орун басары Сергей Рябков билдиргендей, Киевдин жаңжалды жөнгө салуу планы америкалык тарап менен талкууланып жаткан варианттан олуттуу айырмаланат.