Кыргызстан — тоолуу өлкө. Калктын басымдуу бөлүгү бийик жана орточо бийиктиктеги аймактарда жашайт. Акыркы жылдары климаттын өзгөрүшү, экологиялык факторлор, социалдык-экономикалык шарттардын таасири тоо аймактарындагы жашоонун мүнөзүн олуттуу түрдө өзгөртүп жатат. Бул процесстер, албетте, адамдардын ден соолугуна да түздөн-түз таасирин тийгизүүдө.
Бийик тоолуу шарттарда кычкылтектин жетишсиздиги, аба ырайынын кескин алмашуусу, медициналык кызматтарга жеткиликтүүлүктүн чектелиши сыяктуу факторлор ар кандай оорулардын көбөйүшүнө алып келиши мүмкүн. Мындай шартта илимий изилдөөлөрдүн, медициналык байкоолордун жана алдын алуу чараларынын ролу өзгөчө маанилүү.
Ушул багытта өлкөдө көп жылдан бери Тоо физиологиясы жана медицина институту системалуу илимий иштерди жүргүзүп келе жатат. Бүгүн биз тоолуу аймактардагы өзгөрүүлөр калктын ден соолугуна кандай таасир берип жатканын, кандай коркунучтар жана мүмкүнчүлүктөр бар экенин адис менен талкууладык.