БИШКЕК, 18-дек. — Sputnik. Адылбек Касымалиев Чүйдүн Москва районундагы Ак-Суу дарыясында декадалык жөнгө салуучу бассейндин (суу сактагыч) курулушуна мезгил кутучасын салды. Бул тууралуу өкмөттүн маалымат кызматы кабарлады.
Өкмөт башчы жыл сайын республикалык бюджеттен ирригация тармагын өнүктүрүүгө 3 миллиард сомго чейин каражат бөлүнөрүн айткан. Өлкөдө 44 ирригациялык объектинин курулушу пландалып, учурда 10 объект толугу менен пайдаланууга берилген.
Ак-Суу дарыясындагы суу сактагычтын көлөмү 4,5 миллион куб метр. Ал ишке кирсе төрт айылдын 6 500 гектар сугат жери суу менен камсыздалат.
Айыл чарба министрлигинин маалыматында, суу сактагыч 1,3 миллиард сомго курулмакчы. Ошондой эле республика боюнча 106 суу сактагыч куруу пландалган.