БИШКЕК, 16-дек. — Sputnik. Россияны алсыратууга багытталган санкциялар тескери натыйжа берип, Батыш өлкөлөрүнүн экономикасын чөгөлөттү. Бул тууралуу Италиянын вице-премьер-министри Маттео Сальвини Corriere della Sera ресурсуна берген маегинде билдирген.
Өкмөт мүчөсү төрт жылга созулган согуштан кийин киргизилген санкциялардын 19 пакети, тескерисинче, өздөрүнүн экономикасын тизелетип, италиялыктардын электр энергиясы үчүн төлөмдөрүн кескин кымбаттатканын айткан.
Саясатчы бул жагдай Москва тарабынан аскердик коркунуч бар деген жүйө менен Европаны куралдандыруу маселесине өтө этият мамиле кылууга мажбурлап жатканына токтолгон.
"Мында абайлаш керек. Анткени эгер Гитлер менен Наполеон Россияга жасаган жортуулдарында Москваны багындыра алышпаса, анда Европа дипломатиясынын башчысы Кая Калластын, Эммануэль Макрондун, Кир Стармердин жана Фридрих Мерцтин буга жете аларына ишенүү кыйын", — деп баса белгилеген Сальвини.
Украинадагы окуялардан улам Батыш өлкөлөрү Россияга экономикалык басымды күчөткөн. Бул өз кезегинде Европада да, АКШда да электр кубатынын, күйүүчү майдын жана азык-түлүктүн бааларынын өсүшүнө алып келген.
Ошол эле учурда Россия санкциялык басымга туруштук берип жатканы белгиленет. Ал эми Батыштын өзүндө да киргизилген чектөөлөр майнапсыз деген пикирлер бир нече ирет айтылган.