БИШКЕК, 15-дек. — Sputnik. Кыргызстандыктар жаңы жылдын башында 12-январга чейин эс алат. Бул тууралуу министрлер кабинетинин төрагасынын орун басары Эдил Байсалов билдирди.
Аткаминердин айтымында, жаңы жылдык каникулду узартууну өлкө башчы колдоду.
"Мамлекет башчыбыз чечти, бейшемби, жума күндөрү ( 8-9-январь, — ред.) эс алып, ошону менен 1-январдан 12-январга чейин эс алмай болдук", — деди Байсалов.
Белгилей кетсек, буга чейин Эмгек министрлиги да ушундай демилгени сунуштаган. Мекеме 8-январдагы иш күнүн 7-февралга (ишемби), 9-январдагы иш күнүн 25-апрелге жылдырган токтом даярдаган.
Министрлик буга бир нече жагдай себеп болгонун белгилеген. Биринчиден, жаңы жылдан кийин вирустук инфекциялар күч алат. Экинчиден, окуучулардын каникулу 12-январга чейин созулат, алардын ата-энеси менен чогуу эс алуусуна шарт түзүү зарыл. Мындан тышкары, кышкы туризмден түшө турган кирешени көбөйтүү жана энергетикалык жүктү азайтуу да жүйө катары келтирилген.