БИШКЕК, 12-дек. — Sputnik. Эмгек, социалдык камсыздоо жана миграция министрлиги кышкы эс алуу күндөрүн 1-январдан 12-январга чейин узартууну сунуштап жатат. Тиешелүү токтом долбоору коомдук талкууга илинди.
Эмгек кодекси боюнча, кыгызстандыктар 1-7-январь күндөрү эс алышы керек.
Токтом долбоорунда 8-январдагы иш күнүн 7-февралга (ишемби), 9-январдагы иш күнү 25-апрелге (ишемби) жылдыруу сунушталган.
Эгер документ кабыл алынып калса кышкы каникул 11 күнгө созулуп, 12-январдан тарта эл жумушка чыга баштайт.
Министрлик буга бир нече жагдай түрткү экенин белгилеген. Биринчиден, жаңы жылдан кийин вирустук инфекциялар күч алат. Экинчиден, окуучулардын каникулу 12-январга чейин созулат, алардын ата-энеси менен чогуу эс алуусуна шарт түзүү зарыл. Мындан тышкары, кышкы туризмден түшчү кирешени көбөйтүү жана энергетикалык жүктү азайтуу да жүйө катары келтирилген.