БИШКЕК, 8-дек. — Sputnik. Өлкөнүн консолидацияланган бюджети 1,1 триллион сомдон ашты. Бул тууралуу министрлер кабинетинин төрагасы Адылбек Касымалиев өкмөттүн жыйынында билдирген.
Анда “2025-жылга жана 2026-2027-жылдардын пландык мезгилине республикалык бюджети жөнүндө” мыйзамга өзгөртүүлөрдү киргизүү долбоору талкууланды.
“Бекитилген консолидацияланган бюджет 708,8 миллиард сом болчу, азыр – 381,7 миллиард сомго өсүү же 153,8 пайызга көбөйүшү менен жылды жыйынтыктаганы жатабыз. Киреше жана чыгашаны эсептегенден кийин 10 миллиард сомдон ашык профицит менен бул жылдан чыгабыз”, — деди Касымалиев.
Ал 10 айда ИДПнын өсүшү 10 пайызды түзүп, былтыр Кыргызстан ИДПнын реалдуу өсүү темпи боюнча алдыңкы (2024-жылы алдыңкы 3, ага чейин алдыңкы 5) өлкөнүн катарына киргенин белгиледи.
“Бюджеттик мыйзамда бекитилген ИДПнын көлөмү 1 триллион 624 миллиард сом болсо, он айдын жыйынтыгы боюнча 1 триллион 427 миллиард 359 миллион сомду түздү. Ал эми жылдын аягына чейин 1 триллион 779 миллиард сомду түзөт деп божомолдонду, же бекитилгенден 155,6 миллиард сомго көп болот” — деди минкаб башчысы.
Экономиканын бардык тармагында өсүш болгону, өзгөчө курулуштагы өсүш 42,8 пайызды түзгөнү белгиленди.
“ИДПнын адам башына бөлүнүшү 2025-жылы бекитилгени 2616 доллар болсо, жылдын жыйынтыгы менен 2770 долларды түзөт деп болжолдонуп жатат (+154 долл). Улуттук банктын маалыматы боюнча, 2025-жылдын октябрь айынын жыйынтыгы боюнча Кыргызстандын алтын-валюта резерви дээрлик 8 миллиард долларга жетти (7 млрд 955,10 млн долл), 2024-жылдын октябрына салыштырмалуу 3 миллиард 20,34 миллион долларга өстү”, — деди ал.