БИШКЕК, 28-ноя. — Sputnik. Владимир Зеленскийдин кеңсе жетекчиси Андрей Ермак коррупциялык жаңжалдан улам отставкага кетти. Бул тууралуу РИА Новости жазды.
"Кеңсе жетекчиси Андрей Ермак отставкага кетүү боюнча арыз жазды", — деген Зеленский видеокайрылуу жасап жатып.
Буга чейин "Украинская правда" Зеленскийдин айланасындагылар Ермакты энергетикадагы коррупция боюнча ишке тиешелүүлүгүнөн улам кызматтан кетирүүнү сунуштап келишкенин жазган болчу. Демилгени Раданын бир топ депутаты колдогон. Бирок Зеленский Ермакты иштен алуунун ордуна АКШ жана Киевдин башка өнөктөштөрү менен абалды жөнгө салуу боюнча сүйлөшө турган делегациянын жетекчиси кылып дайындаган.
Financial Times гезитинин кабарчысы Кристофер Миллер Ермактын үйүнүн тинтилиши энергетикадагы коррупцияны иликтөө менен байланыштуу экенин тастыктаган. Ал эми "Страна.ua" басылмасы АКШ НАБУ аркылуу Зеленскийди тынчтык планы боюнча көз карашын өзгөртүүгө мажбурлап жатканын божомолдогон.
Украинадагы коррупциялык жаңжал
10-ноябрда өлкөнүн Коррупцияга каршы улуттук бюросу (НАБУ) энергетика тармагындагы азыркы жана мурдагы аткаминерлер, көрүнүктүү бизнесмен жана энергетика тармагындагы коррупцияга аралашкан башка адамдар катышкан кылмыштуу уюмдун ишмердүүлүгүн ачыктап, документтештиргени маалымдалган.
Агенттик ошондой эле Украинанын энергетика тармагындагы уурулук схемаларынан түшкөн акча Киевдин борборундагы кеңсе аркылуу адалданганын аныктаган.
Украина өкмөтү компанияны жана мурдагы энергетика министри Герман Галущенконун үйүн тинтүүдөн кийин "Энергоатомдун" байкоочу кеңешинин ыйгарым укуктарын мөөнөтүнөн мурда токтотту. Зеленскийдин "капчыгы" аталган Тимур Миндич Украинадан чыгып кеткен, иш боюнча мурдагы вице-премьер Чернышов да айыпталып жатат.
Антикоррупциялык бюро кылмыштуу топтун жети мүчөсүнө айып такты. Миндич менен ишкер Александр Цукерманга издөө жарыланган. Жай айларынан тарта юстиция министри болуп турган Галущенко менен энергетика министри Светлана Гринчук отставкага кеткен.
Зеленский кылмыштуу иштен кабары болбогонун айтып келет. Ал эми жаңжалга тиешеси бар деп эсептелген Ермактын кызматтан бошотулушу тууралуу "президенттик кеңсенин кадрлары боюнча маселени өзү чечүүгө укуктуу" экенин айтып жооп кайтарган.