Мамлекеттик салык кызматы тигүү жана текстиль тармагынын өкүлдөрүнө салык сабаттуулугун жогорулатуу жана электрондук салык сервистерин колдонуу көндүмдөрүн кеңейтүүгө багытталган окутуу семинарын өткөрдү билдирди. Салык кызматынын адистери катышуучуларга онлайн кызматтарды колдонуу, Салык төлөөчүнүн кабинетине кирүү, Бирдиктүү идентификациялоо системасы аркылуу авторизациялоо боюнча кадамдык алгоритмдерди көрсөтүштү. Ошондой эле тигүү жана текстиль тармагында салык салуунун негизги аспекттери, жалданма кызматкерлердин киреше салыгын эсептөө жана бирдиктүү салык колдонуу боюнча маалымат берилди. Иш-чарада экспорттоодо керектелүүчү документтер, анын ичинде электрондук эсеп-фактураларды туура тариздөө боюнча түшүндүрмөлөр да берилди. Салык кызматы мындай окутууларды салык мыйзамдары боюнча билимди жогорулатуу жана электрондук сервистерди кеңири колдонуу максатында үзгүлтүксүз өткөрүп келет.
Россия менен Беларустун президенттери Владимир Путин жана Александр Лукашенко Бишкектеги жолугушууда Украина боюнча абалды талкуулашканын РИА Новости жазды. РФ лидери беларустук кесиптеши менен дайым байланышта экенин белгилеп, анын Украинада тынчтык орнотуу процессине кошкон салымына токтолду. "Сиз жаңжал эртерээк аягына чыкса деген адамдардын бирисиз, абалдан толук кабардарсыз. Кырдаалды жөнгө салууга кошкон салымыңызды унутпайбыз, аракеттериңиз алгачкы күндөн тартып эле жемиштүү болгон. Киев режими менен биринчи жолугушуулар да Беларусь жеринде жеке өзүңүздүн катышууңуз менен өткөн", — деди Путин. Лукашенко өз кезегинде Минск эгер Москва кааласа Украина боюнча сүйлөшүүлөрдү өткөрүүгө даяр экенин билдирди. Ал АКШ жаңжалды жөнгө салууда талаптарды туура кое билсе баары жакшы болорун белгилеген. "Бизди туугандык жайыбыздан тышкары союздаштыгыбыз да бириктирип турат. Акыркы окуялар абал жөнгө салынарынан кабар берип тургансыйт", — деди Беларусь президенти. Эскерте кетсек, Путин Кыргызстанга 25-ноябрь күнү мамлекеттик сапар менен келген. Ал Кыргызстандын президенти Садыр Жапаров менен жолугуп, өлкө башчылары мамилени тереңдетүү боюнча биргелешкен билдирүү жасашты. РФ лидери бугун өтө турган ЖККУ саммитине да катышат.