БИШКЕК, 19-ноя. — Sputnik. Израиль Газа секторуна Хиросимага ташталгандай бомбанын бешөө менен сокку урду. Бул тууралуу РИА Новости агенттигине курган маегинде Палестинанын Австриядагы элчиси жана БУУдагы туруктуу өкүлү Салах Абдель Шафи билдирди.
Дипломаттын айтымында, учурда Газада суунун сапаты күмөн жаратууда.
"Кыртыш да, аба да ууланган деп ойлойбуз. Израиль Газага 100 миң тонна жардыруучу зат таштады. Бул — Хиросимага ташталган бомбанын бешөөнө барабар. Армиялардын көбү байытылган уранды пайдаланышат, андыктан жер кыртышы да, суу да ууланган болушу толук ыктымал. Газа азыр баштан-аяк бардык нерсеге муктаж", — деди элчи.
Газанын администрациясы Израиль аймакка жылытуучу шаймандарды, санитардык көчмө кабиналарды, чатырлар үчүн пайдубалдарды, төшөнчүлөрдү алып кирүүгө толугу менен бөгөт койгонун кабарлады. Сууктун түшүшү абалды кыйындатып, 288 миң бүлө жашоого мүмкүн болбогон шартта күн кечирип жатканы айтылды.
Буга чейин Газа бийлиги Израиль менен ХАМАСтын ортосундагы атышпоо боюнча макулдашуу күчүнө киргенден бери секторго азык-түлүк, отун жүктөлгөн 4,4 миң гана автоунаа киргенин билдирген. Бул макулдашылган көлөмдүн 28 пайызын түзөт. Жарым эксклавдын маалыматы боюнча, Израиль азыр деле эт, балык, жумуртка, жашылча-жемиш, сүт азыктары сыяктуу азык-түлүк киргизүүгө тоскоол жаратып келет.
Эскерте кетсек, Израиль менен палестиналык ХАМАС кыймылынын Газа секторундагы атышууну токтотуу боюнча макулдашуусу 10-октябрда күчүнө кирген. Анын алкагында ХАМАС 2023-жылдын 7-октябрынан бери кармалып келген 20 адамды бошоткон, ушуну менен көзү тирүү туткундардын баары Израилге өткөрүлдү. Тель-Авив 2 миңге чукул палестиналыкты барымтадан чыгарды, алардын катарында өмүрүнүн акырына чейин эркинен ажыратылган террорчулар бар. Ушу тапта ХАМАС Израилге барымтада көз жумган туткундардын сөөгүн өткөрүп берип жатат.