Салык кызматы реформанын экинчи этабына өтүп жатат. Бул тууралуу мекеменин маалымат кызматы билдирди. Ага ылайык, жаңы жылдан баштап KEZET электрондук эсепке алуу модулу ишке кирет. Саамалыктын алкагында салык тескөөчүсүн жасалма интеллект алмаштырат. Аталган программа жарым жыл сыналат. Майдан баштап инспекторлордун штаты кыскартыла баштайт. "Биринчи этапта 500 кызматкер, жарым жылдан кийин дагы 500 кызматкер кыскартылат. Азыр бизде 3 400 салык кызматкери бар, бир жылдан кийин миңге азайтылмакчы. Мындай масштабдуу кыскартуу көзөмөлдүн азайышына алып келбей тургандыгын белгилей кетүү керек", — деген кызматтын төрагасы Алмамбет Шыкмаматов. Аткаминердин айтымында, реформанын жыйынтыгында Салык кызматы жазалоочу эмес, тейлөөчү сервиске айланат.
Борбор калаада 1-декабрдан тарта таштандыны кайра иштеткен завод электр кубатын бере баштайт. Бул туурасында калаа башчысы Айбек Жунушалиев Sputnik Кыргызстандын маалымат борборундагы брифингде айтты. Калаа мэринин айтымында, завод шаарды электр кубаты менен камсыздоого даяр."Бул маселени чечүүдө электр энергиясын өндүрүүнүн базасын түзүү негизги ролду ойнойт. Энергетика министрлиги бул багытта чоң иштерди жасап жатат. 1-декабрдан тарта таштандыны кайра иштеткен завод электр кубатын бере баштайт", — деди мэр. Ал белгилегендей, таштандыны кайра иштетүүчү завод суткасына 850-1200 тоннага чейин калдык иштетүүгө эсептелген. Ал эми башкы план долбоорунда каралган чен-өлчөмдөргө ылайык, келечекте завод күнүнө 3,5 миң тонна акыр-чикирди жок кыла тургандай болушу керек.
Европалык адистер Украинадагы "Антироссия" долбоору кыйрай турганын эскертип жатышат. Бул тууралуу Россиянын Тышкы чалгын кызматы билдиргенин РИА Новости жазды. "Европанын алдыңкы мамлекеттеринин тышкы саясат жана аскердик ведомстволорунун эксперттери Батыш Украинада түзгөн "Антироссия" долбоору кыйрап жатканын айтып коңгуроо кагышууда. Жогору жактарга жөнөтүлгөн докладдарда Киев режими акыры кыйрай турганы ачык эле айтылууда", — деп белгиленет маалыматта. Анда Брюссель чет жактан келген жардамды соруп жаткан Укринадагы ири коррупцияга чоң көңүл буруп жатканы көрсөтүлгөн. Чалгын кызматынын маалыматы боюнча, европалык лидерлер жана биримдиктин жетекчилиги Киев режимин колдоо үчүн бөлүнгөн жүз миллиарддаган евронун кумга сиңген суудай жок болгонун кабыл ала албай жатышат. Ал эми украиналыктар өздөрүн Владимир Зеленскийдин үзөңгүлөшү Тимур Миндичтин ишинен улам саткынчылыкка кабылгандай сезишүүдө.