1927-жылы 23-январда Совет өкмөтү Кызыл армия үчүн атайын даярдыктан өткөн кадрларды даярдоо боюнча коргоо, авиациялык жана химиялык курулушуна көмөкчү коомун (Осоавиахим) түптөйт. Ал СССРге спортту жайылтып, мылтык жана тапанчадан атканды үйрөтүүнү максат кылган. Осоавиахим аэроклубдарды уюштуруп, учкучтарды даярдай баштаган.
23-мартта Кыргыз автономиялуу облусунда Осоавиахимдин бөлүмү ачылып, Жусуп Абдрахманов жетекчиликке дайындалат. Ушундан тартып Кыргызстанда Кызыл армия үчүн кадрлар даярдала баштайт. 1934-жылы Кыргызстанда аэроклуб ачылып, кыргыздан туңгуч учкучтар чыгат. Улуу Ата Мекендик согуш учурунда Осоавиахим фронт үчүн атчан, жөө жүргөн аскерлерди, медайымдарды, учкучтарды даярдаган. Колумнист Алмаз Батилов Борбордук мамлекеттик архив жана Алыкул Осмонов атындагы Улуттук китепкананын өзгөчө баалуу басылмаларды сактаган бөлүмүнөн сейрек сүрөттөрдү жана маалыматтарды тапкан.