БИШКЕК, 14-ноя. — Sputnik. Бүгүн Бишкектеги таштандыны кайра иштетүүчү жаңы заводго катуу тиричилик калдыктары жеткирилди. Бул тууралуу мэрия билдирди.
Сынамык иретиндеги жасалып жаткан иш-чарага жаратылыш ресурстары, экология жана техникалык көзөмөл министри Медер Машиев, Бишкек мэри Айбек Жунушалиев жана башка расмий адамдар катышкан.
"Пилоттук режимдин алкагында 17 атайын техника бирден рейс жасап, жалпы жонунан 126 тонна таштанды жеткирди. Көлөм 1 000 тоннага жеткенден кийин таштандыны утилдештирип, андан соң электр энергиясын өндүрүү процесси ишке киргизилет", — деп айтылат маалыматта.
Заводдун курулушу учурда акыркы этабында, толугу менен 2025-жылдын 26-декабрында ачылат.
Долбоор 2023-жылдын ноябрында кол коюлган келишимдин алкагында ишке ашырылууда. 2024-жылдын 29-мартында курулушка министрлер кабинетинин төрагасы мезгил кутучасын салган.