БИШКЕК, 6-ноя. — Sputnik. Борбор Азия менен алака курган мамлекеттер абдан көп, бул кеңири жайылган формат. Мындай пикирин РФ президентинин маалымат катчысы Дмитрий Песков билдиргенин РИА Новости жазды.
Ага "Борбор Азия — АКШ" саммитине Кремлдин позициясы тууралуу суроо узатылган.
"Кытай — Борбор Азия", "Япония — Борбор Азия", "ЕБ — Борбор Азия" жолугушуулары бар. Бул кеңири колдонулган формат. Борбор Азиядагы досторубуз, өнөктөштөрүбүз тышкы саясатындагы бардык мүмкүнчүлүктөрдү пайдаланып, мамиле куруп жатканы кадыресе көрүнүш", — деди Песков журналисттерге.
Ал Россиянын Борбор Азия менен түзүлгөн өзүнүн жолугушуу форматы бар экенин, жакында эле "РФ — БА" саммити өткөнүн эске салды. Песков Россия Борбор Азия мамлекеттери менен өзүнө да, аймактагы өнөктөштөрүнө да туура келген мамиле түзгөнүн, Москва үчүн ортодогу байланыштын мааниси өтө чоң экенин кошумчалаган.