Россиянын Кыргызстандагы маданият күндөрү кандай өттү. Сүрөт баян

Кыргызстанда Россиянын маданият күндөрү чоң салтанат менен өттү. Сунушталган сүрөттөрдө эки өлкөнүн байланышын бекемдөөгө салым кошо турган ар кыл иш-чаралардын эсте каларлык ирмемдери чагылдырылган.

29-октябрдан 2-ноябрга чейин өлкө тургундары россиялык маданиятка сүңгүүгө мүмкүнчүлүк алышты. Россиянын Маданият министрлиги менен Росконцерттин колдоосунда уюштурулган иш-чара чыныгы майрамга айланды.

1 / 12

Көрүүчүлөр Россиянын маданиятына эмгек сиңирген артист Пелагеянын өнөрүнө күбө болушту. Концерт Улуттук филармонияда өттү.

2 / 12

Зал концерт башталгыча эле толуп калды. Эл сахнага чыккан өнөрпоздорду жылуу кабыл алып, сүрөп турду.

3 / 12

Сергей Жилиндин жетекчилиги алдындагы "Фонограф‑Симфо Джаз" оркестри концерттин көркүн ачты. Эстрада менен классикалык жана аспаптык музыканын айкалышы көпчүлүктүн жүрөгүнөн түнөк тапты.

4 / 12

Музыка ышкыбоздору филармониянын сахнасынан Россиянын алдыңкы артисттеринин чеберчилигине, түрдүү жанрларга күбө болушту. Мындан улам иш-чара өзгөчө маданий окуя болуп калды.

5 / 12

Россиянын маданият министри Ольга Любимова "Кыргызстан-2025" кинофестивалынын ачылышында көрсөтүүгө тандалган тасмалардын баары ортодогу алаканы бекемдей турганын белгиледи

6 / 12

Россия киносунун фестивалы борбор калаадагы "Манас" кинотеатрында өттү. Аны режиссер Никита Высоцкийдин советтик контрчалгынчылардын 1944-жылдын жайындагы ишин көрсөткөн аскердик драмасы ачты

7 / 12

Залда бош орун болгон жок. Кыргызстандыктар популярдуу болуп жаткан тасмаларды бекер көрүүгө мүмкүнчүлүк алышты.

8 / 12

Никита Михалковдун "12" аталышындагы фильми боюнча коюлган ушундай эле аталыштагы спектаклинин премьерасы да аншлаг менен өттү

9 / 12

Россиянын Кыргызстандагы маданият күндөрү жергиликтүү тургундарга атагы алыска кеткен эмгекти өз шаарынан көрүүгө шарт түзүп берди

10 / 12

"12" — 18 жаштагы чечен уландын асырап алган офицер атасынын өлүмүнө тиешелүүлүгүн аныктай турган 12 сот арачысы жөнүндө чыгарма. 3,5 саатка созулган кинокартина кызуу талкууга жем таштады.

11 / 12

Министрлер кабинетинин төрагасы Адылбек Касымалиев кинорежиссер Никита Михалковго Достук орденин тапшырды. Өкмөт башчы режиссерду 80 жылдыгы менен куттуктап, дүйнөлүк кинематографияга кошкон салымын белгиледи.

12 / 12

Россиянын маданият министри Ольга Любимова Адылбек Касымалиевдин кабыл алуусунда болуп, меймандостук үчүн ыраазычылык билдирди. Анын айтымында, Кыргызстанга жасалган сапар кызматташуу үчүн жаңы мүмкүнчүлүктөргө жол ачат.

Тема боюнча:

Бишкекте Никита Михалковдун "12" спектакли аншлаг менен өттү. Видео

Россиянын Кыргызстандагы маданият күндөрү салтанат менен ачылды. Видео