БИШКЕК, 3-ноя. — Sputnik. Ысык-Көлгө түшө турган Асман шаарын жеке курулуш компаниялары курарын Sputnik агенттигине Улуттук инвестиция агенттигинин жетекчиси Равшан Сабиров билдирди.
Анын айтымында, шаар этап-этабы менен салынат.
"Курулуш компанияларынын бирине 100 гектар, экинчисине 80 гектар жер бөлүндү. Асман шаарынын жалпы аянты — 4 миң гектар. Жаңы калааны курууга бардык курулуш компанияларын чакырабыз, шарттар баарына бирдей. Каалоочулар жетекчиликке кайрылса болот", — деди Сабиров.
Эске салсак, 2023-жылдын июнь айында өлкө башчы Садыр Жапаров Ысык-Көлдөгү Асман шаарынын курулушуна капсула салган. Калааны кура турган инвесторлор бул шаар "акылдуу", коммерциялык, спорттук жана оюн-зоок секторлоруна бөлүнөрүн айтышкан. Мындан тышкары, шаардагы бардык таштанды кайрадан иштетилип турары, Ысык-Көлдүн ортосуна жасалма арал курулуп, шаарда жети жылдыздуу мейманканалар, казино, ири университеттер, музейлер, мечиттер, ооруканалар, гольф талаалары, жогорку ылдамдыктагы поезд, стадион, ипподром иштей турганы белгиленген.