Министрлер кабинетинин төрагасы Адылбек Касымалиев Ысык-Көл облусуна болгон жумуш сапарынын алкагында, Каракол шаарынын таштанды калдыктарын технологиялык жол менен жок кылуучу заводдун курулушуна мезгил кутучасын салуу аземине катышты. Минкаб башчысы Адылбек Касымалиев Кыргызстанда экологиялык абалды жакшыртуу жана калктын жашоо сапатын жогорулатуу максатында таштандыларды технологиялык ыкма менен кайра иштетүү аркылуу электр энергиясын өндүрүүчү ири инвестициялык долбоорлор ишке ашырылып жатканын белгилеп, бул багытта Кытайдын компаниясы Кыргызстандагы өнөктөштөр менен биргеликте үч ири долбоорду — Бишкек, Ош жана Ысык-Көл долбоорлорун — ишке ашырып жатканын белгиледи. Минкаб төрагасы сөзүнүн аягында бул долбоор Кыргызстан менен Кытайдын достук мамилесин дагы бекемдеп, Ысык-Көл облусунун өнүгүүсүнө зор салым кошооруна ишеним артты. Белгилей кетсек, Ысык-Көл облусундагы долбоор боюнча Баштапкы этапта Ак-Суу району жана Балыкчы шаарында күнүнө 600 тонна таштанды иштете турган технологиялык электр станциялары курулат. Кийинки этаптарда министрлер кабинетинин чечимине, облустагы жана коңшу аймактардагы таштандылардын көлөмүнө жараша, инвестор тарабынан кошумча иштетүү линиялары курулат. Бул этаптагы долбоордун жалпы инвестиция көлөмү болжол менен жалпы 140 миллион долларды түзөт.
Бишкек шаарынын Ленин РИИБи коомдук тартипти бузган, коомдук жайларда өзүн агрессивдүү алып жүргөн, массалык мушташка катышкан кыргызстандыктар беш жылга жылга чейин эркинен ажырашы мүмкүн экенин эскертти.Буга мисал кылып, Бишкекте түнкүсүн мушташа кеткен эки жигиттин видеосун жарыялады. Окуя калаадагы соода түйүндөрүнүн биринин алдында болгон. 22 жана 21 жаштагы жигиттерге “Майда бейбаштык” боюнча прокотол түзүлүп, убактылуу кармоочу жайга киргизилди. “Мыйзамды сактап, коомдук тартипти сыйлап, башкаларга коопсуздук жаратпоону суранабыз”, — деп айтылат маалыматта.
АКШ президенти Дональд Трамп россиялык кесиптеши Владимир Путин менен Украинадагы жаңжалды токтотуу боюнча так план болгондо гана жолугарын айтты. Бул тууралуу РИА Новости жазды. “Келишим түзөрүбүзгө көзүбүз жетиши керек. Убактымды текке кетиргим келбейт. Владимир Путин менен мамилем ар дайым жакшы болчу”, — деген Трамп. Россиянын түз инвестициялар фондунун башчысы, Россия президентинин чет мамлекеттер менен инвестициялык-экономикалык кызматташуу боюнча атайын өкүлү америкалык телеканалдардын бириндеги маегинде Трамп менен Путин жолугарын, бирок жолугушуу кийинчерээк болорун айткан. Ал Москва Украинадагы жаңжалды эртерээк токтотууга кызыкдар экенин, бирок ал үчүн Россиянын кызыкчылыгы эске алынышы керектигин белгилеген. Эскерте кетсек, өткөн жумада АКШ менен Россия президенттери телефондон 2,5 саттай сүйлөшүп, Венгрияда жолугууну чечишкен. Бирок шаршемби күнү Трамп жолугушуу өтпөй турганын, анткени тараптар тийиштүү натыйжага жетпей калышы мүмкүн экенин билдирди. АКШ лидери россиялык кесиптеши менен келечекте жолугууга үмүт артарын, Украина маселесин жөнгө салуу оюнан кайтпай турганын кошумчалаган.