БИШКЕК, 22-окт. — Sputnik. Европа өлкөлөрү жана Киев Россия менен болгон жаңжалды токтотуу мүмкүнчүлүгүн изилдеп жатканын Bloomberg ишенимдүү маалымат булагына таянып жазды.
"Европа өлкөлөрү менен Украина 12 пунктудан турган сунуштун үстүндө иштеп жатышат. Анда Киев — Москва жаңжалын учурдагы фронттун линиясынан баштап токтотуу каралган", — деди агенттик.
Болжолдуу план:
пландын аткарылышын АКШ президенти Дональд Трамп жетектеген кеңеш көзөмөлдөйт;
Москва менен Киев бошотулган аймактарды башкаруу боюнча сүйлөшүүлөрдү баштайт, бирок Европа да, Украина да аларды юридикалык жактан Россияга карайт деп тааныбайт. Ал эми Россия Крымдын, Донецк Элдик Республикасынын (ДНР), Луганск Элдик Республикасынын (ЛХР), Запорожье жана Херсон облустарынын аннексияланышы Конституцияда жазылганын жана сүйлөшүүгө болбой турганын бир нече жолу баса белгилеген. Путин ошондой эле Москва Киевге аймактардын ордуна кепилдик берүүнү эч качан ойлобогонун айткан;
Украина коопсуздук кепилдигин, чыгымдын ордун толтуруу үчүн каражат жана Европа биримдигине кирүү мүмкүнчүлүгүн алат;
Россияга каршы санкциялар акырындык менен жоюлат, бирок Борбордук банктын тоңдурулган резервдери Москва Украинаны калыбына келтирүүгө салым кошууга макул болгондон кийин гана кайтарылышы мүмкүн;
атышпоо келишиминен кийин туткундарды алмашуу жүрөт.
Мындан тышкары, материалда күч менен депортацияланган делген балдарды кайтаруу жөнүндө тезис бар. Эске салсак, Стамбулдагы сүйлөшүүлөрдө украин тарап республикадан уурдалды делген 339 баланын тизмесин Россияга тапшырган. Президенттин жардамчысы Владимир Мединский белгилегендей, алардын көбү Россиянын аймагына эч качан кирген эмес. Ошондой эле тизмедеги 50 ысым чоң адамдар экени аныкталган. Балдардын айрымдары буга чейин Украинага кайтарылган, иш уланууда.
Өткөн аптада Ак үйдүн маалымат кызматы Трамп Россия менен Украинага жаңжалды фронттун учурдагы сызыгынан токтотууну, башка жагдайларды кийинчерээк сүйлөшүп алууну кайрадан сунуштаганын билдирген.
Ал эми РФ президентинин маалымат катчысы Дмитрий Песков Москванын бул маселе боюнча позициясы ырааттуу жана өзгөрүүсүз каларын белгилеген. Владимир Путин кризистин түпкү себептери жоюлганда гана узак мөөнөттүү тынчтык орной турганын айтып келет.