БИШКЕК, 17-окт. — Sputnik. Кыргызстандын туризм тармагы башынан кризис кечирип жатканын эксперттер билдирди. Алар Sputnik агенттигинде өткөн брифингге катышкан.
"Тоодогу куткаруу кызматы" коомдук фондунун жана Жибек Жолундагы туризм ассоциациясынын төрагасы Владимир Комиссаров
© Sputnik / Самрат Карачев
"Тоодогу куткаруу кызматы" коомдук фондунун жана Жибек Жолундагы туризм ассоциациясынын төрагасы Владимир Комиссаровдун айтымында, тоо туризминдеги жамааттык коопсуздук системасынын начардыгы, кадрлардын тартыштыгы байкалып, тармакты башкаруу системасы натыйжасыз деп табылган.
Тез арада чечүүнү талап кылган көйгөйлөр:
тармактын профилдик департамент тарабынан бул жааттын натыйжасыз башкарылышы;
жөнгө салуунун натыйжалуу механизмдеринин жоктугу, анын ичинде лицензиялоо жана аккредитациялоо, ошондой эле гиддердин жана инструкторлордун ишин жөнгө салган ченемдердин жоктугу;
Кыргызстанды туристтик багыт жана улуттук туристтик продукт катары илгерилетүүнүн натыйжасынын төмөндүгү;
бардык деңгээлдеги кадрлардын жетишсиздиги жана адистерди даярдоо системасынын начардыгы;
тоолордогу туризмдин жамааттык коопсуздугунун өтө төмөн деңгээли. Эл аралык коопсуздук рейтингинде республика талап кылынган 70 баллдын 30ун гана алган;
тармакты өнүктүрүүгө багытталган документтердин ишке ашырылышына мониторинг менен талдоонун жоктугу;
туризмдин абалын чагылдырбаган статистиканын натыйжасыз системасы;
тармакта экспертиза системасынын жоктугу;
калктын туризмди туруктуу өнүктүрүү маанилүү экенин түшүнбөй жатышы;
ички туризмдин начар өнүгүшү жана натыйжалуу аймактык саясаттын жоктугу.
Эксперттердин пикиринде, Кыргызстандын туризмди туруктуу өнүктүрүү боюнча 2025-2030-жылдарга карата программасында белгиленген көйгөйлөр курчуп кетти. Программа бекитилгенден бери тогуз айдан ашык убакыт өттү, бирок андагы иш-чаралардын көбү ишке ашырыла элек.