БИШКЕК, 14-окт. — Sputnik. "Ош сила" фиктивдүү лотереясын түзүү менен алдамчылык схемасын уюштургандар аныкталды. Бул тууралуу УКМК билдирди.
Маалыматка караганда, алар баюу максатында өз адамдарын жеңүүчү деп жарыялап келишкен.
"Катышуучулардын санын көбөйтүү үчүн автоунаа, батир, жер сыяктуу кымбат баалуу байгелер ойнотулган. Ал эми жеңүүчүлөр атайын дайындалган адамдар болуп, бардык байге лотереянын уюштуруучуларында калган", — деп айтылат маалыматта.
Факт боюнча "Алдамчылык" беренеси менен кылмыш иши козголду. Лотереянын мыйзамсыз уюштуруучулары К.у.К. жана Б.М.А. кармалып, № 21 тергөө абагына киргизилди.
Учурда бул фактыга тиешеси бар бардык жагдайларды жана адамдарды аныктоо боюнча кошумча тергөө иш-чаралары жүргүзүлүүдө.
УКМК Кыргызстандын аймагында мыйзамдуу лотереяны "Мамлекеттик лотерея компаниясы" гана уюштура аларын эске салды.