БИШКЕК, 6-окт. — Sputnik. Президент Садыр Жапаров Улуттук коопсуздук мамлекеттик комитетинин Бишкек шаары боюнча башкы башкармалыгынын имаратын ачты. Бул тууралуу өлкө башчынын маалымат кызматы билдирди.
Жапаров Бишкектин чекисттери 2014-жылга чейин 40 чарчы метрлик имаратта иштеп келишкенин айтып, 2014-жылы өз имаратына ээ болгону менен ал жакта деле толук кандуу иш шарттары камсыздалбаганын белгилеген.
"Бүдөмүк болуп жаткан азыркы учур улуттук коопсуздук органдарынан жаңы ык-амалдарды жана ишке өзгөчө мамилени талап кылууда. Өлкөнүн маалыматтык мейкиндигин коргоо, жат идеологиясын тымызын жайылткандардан сактануу, ичибизге сызып кирген чагымчыл иш-аракеттерди болтурбоо сыяктуу улуттук коопсуздугубузга, мамлекеттин туруктуулугуна залалы тие турган коркунучтуу көрүнүштөр менен алдын ала күрөшүү милдети курч турат", — деген Жапаров.
Имараттын жалпы аянты 5 000 чарчы метрди түзүп, Түштүк магистралда жайгашкан.