1960-жылы 1-октябрда конвейерден биринчи "Запорожец" ЗАЗ-965 чыга баштаган. Бул кибирген автокөлүк ири державанын символу да болуп калды.
Биринчи ЗАЗ-965 болгону 1800 рубль туруп, чыныгы элдик автокөлүккө айланып кеткен.
"Жарым саат уят болгонуң менен ишке жетип аласың" деп юмор айтылган же актер Андей Миронов "консерва банкы" деп тамашалаган "Запорожецтин" артыкчылыгы ого эле көп болгон.
Көп жерден такалбай, тыгылбай өтүп кете алган, майлап-сүттөгөнгө жеңил жана оңдоп-түздөгөн иштери өтө оңой эле. Арткы эшиги жок болгонуна карабай, арткы отургучтарына бала-чака коопсуз жайгашкан, ал эми жайык капоту тамак-аш коюп ичкенге ылайыктуу болчу. Ал тургай отургучту жазып жиберип, тук этип алчу керебетке айлантып алып турушкан.
Арт жагында жайгашкан адаттан тышкаркы кыймылдаткычынан улам "машина картошка менен жүрөт экен" деген аңыз кептер айтылып кеткен.
"Запорожецтерди" чет өлкөдө да Jalta жана Eliette бренддери менен жакшы сатып алышкан. Запорожьедеги завод СССР аймагында майыптыгы барлар үчүн атайын моделдүү автокөлүк чыгарган бирден-бир ишкана болгон.
34 жыл ичинде үч миллиондон ашык автоунаа жасалган. Аларды бирин Ленинград мамлекеттик университетинин студенти Владимир Путин айдап жүргөн. Аны апасы лотереядан утуп алган.
"Андагы үй-бүлөлүк чогулушту жакшы эстейм. Апам менен атам дасторкон четинде отуруп, "эмне кылсак экен" деп сүйлөшкөнү эсимде. Апам машинаны алыш керектигин айтып, "уулум айдасын" деди. Бул ата-энем үчүн кандай мааниге ээ болгондугун аңдап жатасыз да", — деп Россиянын президенти эстеп отуруп айтып берген.
Бүгүн да ЗАЗ заводдорунун чыгарган машинелерин сүйүүчүлөр атайын клубдарга чогулуп, өздөрүнүн "ЖУЖиктерин" (эл арасында "Запорожецти" жакшы көргөндөр ушинтип да аташкан) сакташат. Ал эми автоунаа чогулткан коллекциячылар бул кичинекей автокөлүктү үч миң долларга чейин алганга даяр.
Тилекке каршы, доордун символу оош-кыйыштуу заманда өзгөрүүгө туш болду. "Запорожье" автоунаа заводу таптакыр жабылып калды. Украина бай тарыхы бар, жөнгө салынып калган өндүрүштү сактап кала алган жок. СССР урагандан кийин 1994-жылы "Запорожецти" чыгарууну токтотушту.