БИШКЕК, 29-сен. — Sputnik. Кыргызстандын тышкы иштер министри Жээнбек Кулубаев АКШнын мамлекеттик катчысынын орун басары Кристофер Ландау менен Нью-Йорк шаарында жолугушуп, Кыргызстандын жарандары үчүн визалык талаптарды жеңилдетүү маселесин көтөрдү. Бул тууралуу мекеменин маалымат кызматы билдирди.
Кабарга караганда, алар БУУнун Башкы Ассамблеясынын 80-сессиясынын алкагында жолугушкан. Тараптар саясий жана соода-экономикалык кызматташтыкты кеңейтүү боюнча сүйлөшкөнү белгиленген.
© Фото / Пресс-служба МИД КР
"Ошондой эле санкциялык, визалык жана миграциялык маселелер талкууланды. Министр Жээнбек Кулубаев санкцияларга карата тең салмактуу мамиле зарылдыгына жана Кыргызстандын жарандары үчүн визалык талаптарды жеңилдетүүнүн маанилүүлүгүнө токтолду", — деп айтылат кабарда.
Андан тышкары, кыргыз тарап АКШлык инвесторлорду жана жаңы технологияларды тартууга кызыкдарлыгын, бул үчүн бардык шарттарды түзүүгө даяр экенин билдирген.