Мамлекеттик мпотекалык компания жаш мугалимдерди пайызсыз турак жай менен камсыз кылуу программасын иштеп чыкты. Мындай тапшырманы минкаб башчысы Адылбек Касымалиев берди. Маалым болгондой, өкмөттө мектепке чейинки жана мектептеги билим берүү маселелери каралган жыйын өткөн. Анын жүрүшүндө минкаб төрагасы Агартуу министрлигине аймактарды бала бакчалар менен камсыздоону күчөтүүнү тапшырды. “Китептерди иштеп чыгууга жана басып чыгарууга 3 миллиард сом каржылансын. Билим берүү 12 жылдык окууга өткөндүгүнө байланыштуу мугалимдердин квалификациясын жогорулатуу боюнча иш-чаралар үзгүлтүксүз жүргүзүлсүн. МИК жаш мугалимдерди нөлдүк пайыздык шартта турак жай менен камсыз кылуу программасын иштеп чыксын. Курулуш министрлиги Бишкек, Ош жана Манас шаарларында калк санынын өсүп жатканын эске алып билим берүү имараттарын куруу боюнча планды кайрадан карап чыксын”, — деди Касымалиев. Жыйында 2026-жылга жана 2027–2028-жылдардын пландык мезгилине республикалык бюджеттин долбоору каралды. Финансы министрлиги 2025-жылга 708 миллиард сом план коюлуп, январь-август айларынын жыйынтыгы менен 749 миллиард сом аткарылды, жыл аягына чейин 1 триллион сомго жетери күтүлүп жатканын маалымдады.
Токтоболот Абдумомунов атындагы Кыргыз улуттук драма театрынын "Акыркы кат" спектакли Казакстандагы эл аралык фестивалда "Эң мыкты спектакль" деп бааланды. Бул тууралуу Маданият, маалымат жана жаштар саясаты министрлигинен кабарлашты. Түрк тилдүү мамлекеттердин эл аралык театр фестивалы Актау шаарында өтүп, ага 7 өлкөнүн театры катышкан. Театр иш-чарага драматург Кайрат Иманалиевдин калемине таандык, Уланмырза Карыпбаев сахналаштырган "Акыркы кат" спектакли менен барган. Чыгармада Кара-Кыргыз автономиялуу облусун түзүүдөн тартып мамлекеттин, элдин жаркын келечеги үчүн жан үрөгөн улуу инсандардын баа жеткис эмгеги баяндалат.
Европа Россияга каршы жаңы согуш отун тутандырууга аракет кылып жатканын норвегиялык Steigan басылмасына таянып РИА Новости жазды."Европа чоң согуштун босогосунда турат. Муну Польша эли каалап жаткандыктан же Россия жаңы фронт ачкысы келгендиктен эмес, НАТО менен АКШга өз оюнуна кошо турган фигура керек болгондуктан жасашмакчы. Бул схемага Польша туура келип, Россия менен болгон жаңжалда фронттук мамлекеттин ролун алуу үчүн Варшава барган сайын басымга дуушар болууда", — деп жазылат макалада. 10-сентябрда Польшанын премьер-министри Дональд Туск "коркунуч жараткан" учкучсуз учактар Польшанын аймагында атып түшүрүлгөнүн билдирип, өлкөнүн аба мейкиндигин 19 дрон кесип өткөнүн белгилеген. Саясатчы бул үчүн Москваны негизсиз айыптаган. РФ Коргоо министрлиги россиялык күчтөр 10-сентябрга караган түнү Украинанын аскер-өнөр жай комплексинин объектилерине массалык сокку урганын, бирок Польшанын аймагы бутага алынбагын билдирген. Министрлик бул маселе боюнча польшалык кесиптештери сүйлөшүүгө даяр экенин билдирген.Бул Варшаванын аба мейкиндигин бузду деп Москваны негизсиз айыптаган биринчи учуру эмес. 2022-жылдын аягында Польшанын Украина менен чек арасына снаряд түшүп, эки киши каза болгон.Алгач жергиликтүү бийлик ок-дары Россияда жасалган деп божомолдоп, кийинчерээк ошол кездеги президент Анджей Дуда бул Украинанын куралдуу күчтөрүнө таандык болушу мүмкүн экенин мойнуна алган.