Эгемендик алгандан бери Улуттук банк коллекциялык тыйындын 98 түрүн чыгарды. Бул тууралуу Күмүшай Артыкова Sputnik Кыргызстан радиосунун эфиринде маек куруп жатып билдирди.
Анын айтымында, мунун ичинен айрыкча алтын монеталарга суроо-талап абдан жогору.
"Улуттук банк баш-аягы коллекциялык тыйындын 98 түрүн чыгарган. Анын ичинде алтындан — 6, күмүштөн — 68, жез-никелден 24 түрү даярдалган. Жасалгалары абдан кызыктуу, өзгөчө технология колдонулган. Алтын тыйындар сатылып бүткөн, анткени суроо-талап абдан жогору. Учурда Улуттук банк сатыкка койгон коллекциялык тыйындардын эң кымбаты 93 миң сом. Ал — "Тай туяк" аталышындагы салмагы 500 грамм болгон күмүш монета. Ал эми бюджеттик түрлөрү тууралуу айтсак, жез-никелден жасалган 700-900 сомдук коллекциялык тыйындар бар. Орточо баадагылар болсо 4 миң сомдон 6 миң сомго чейин турат", — деди Артыкова.
Ошондой эле ал сатылып жаткан тыйындардын тизмеси менен Улуттук банктын сайтынан таанышууга болорун кошумчалады.