Кыргызстандын президентинин администрациясында Түрк мамлекеттер уюмуна (ТМУ) мүчө-мамлекеттердин өкмөт башчыларынын/вице-президентинин жолугушуусу башталды. Алгач, жолугушуу башталаар алдында Кыргызстандын министрлер кабинетинин төрагасы Адылбек Касымалиев делегация башчыларын “Ынтымак Ордонун” имаратынан тосуп алып салашдашты. Андан соң, ТМУга мүчө мамлекеттердин өкмөт башчыларынын жана вице-президентинин биргеликте сүрөткө түшүү аземи болду. Андан кийин жолугушуу боло турган сүйлөшүү залына өтүштү. Жолугушуунун жүрүшүндө ТМУнун алкагындагы артыкчылыктуу багыттарды экономика, соода, инвестиция, транспорт, санариптештирүү, энергетика, айыл чарба жана башка тармактарда кызматташуу маселелер каралат. Ошондой эле ТМУ алкагында буга чейин кабыл алынган чечимдердин аткарылышы жана ишмердүүктүн механизмдерин жакшыртуу маселелери талкууланат. Кошумчалай кетсек, Түрк мамлекеттер уюмуна мүчө мамлекеттердин Өкмөт башчыларынын/Вице-президентинин жолугушуусун ТМУга мүчө мамлекеттердин жалпыга маалымдоо каражаттарынын жана эл аралык ЖМКнын 90дон ашуун өкүлү маалыматтык жактан камсыздоо иштерин жүргүзүүдө.
Кыргызстандын борборун Жалал-Абадга (Манас шаарына) көчүрүү азыр күн тартибине коюлган эмес, эч кандай андай ой жок. Бул туурасында УКМКнын төрагасы Камчыбек Ташиев интервьюсунда айтты. Атайын кызматтын жетекчиси анткен менен баш калаа Манас деп аталса деле жакшы болмоктугун кошумчалап, аны эл референдумда чечерин, бирок өлкө жетекчилигинде мындай ой жоктугун белгиледи.Ташиевдин айткандарынын урунттуу жерлери: Жалал-Абад шаарын Манас деп атоо менин да идеям деп айтсам болот; облустун аталышы ошол боюнча калат; Жалал-Абаддын тез өнүгүп жатканынын себеби — жергиликтүү бийлик ыкчам иштөөдө; Башкаларга деле жетиштүү каражат бөлүнүүдө, бирок алар жакшы аракет кылбай жатышат. Айрымдары бөлүнгөн акчаны төгүп-чачып жок кылышты. Эске салсак, кечээ, 17-сентябрда, президент Садыр Жапаров Жалал-Абадды Манас шаары деп атоо боюнча мыйзамга кол койду.
Улуттук банктын эксперттик бөлүмүнүн башкы экономисти Күмүшай Артыкова учурдагы эң кымбат коллекциялык тыйын "Тай туяктын" салмагы 500 граммга жетерин билдирди. Эгемендик алгандан бери Улуттук банк коллекциялык тыйындын 98 түрүн чыгарды.Анын айтымында, мунун ичинен айрыкча алтын монеталарга суроо-талап абдан жогору.Ошондой эле ал сатылып жаткан тыйындардын тизмеси менен Улуттук банктын сайтынан таанышууга болорун кошумчалады.
НАТО өлкөлөрүнүн эсебинен сатып алынган аскердик жүктүн алгачкы партиясы Украинага жеткириле баштаганын Рейтер агенттиги НАТОнун Украинадагы башкы өкүлү Патрик Тернерге таянуу менен жазганын РИА Новости кабарлады. Шейшембиде Трамптын администрациясы Киевге АКШнын НАТО боюнча өнөктөштөрү каржылаган биринчи аскердик жардам пакетин жактырганын кабарлаган.Эске салсак, августтун башында Украинанын Коргоо министрлигинин башчысы Денис Шмыгаль АКШ менен НАТО Украинага колдоо көрсөтүүнүн PURL деп аталган жаңы механизмин ишке киргизип жаткандыгын белгилеген. Ага ылайык, Киев армиясы учурда муктаж болуп турган куралдардын тизмесин түзмөк. Ал эми альянс аны карап чыгып, өзүнүн запасынан же АКШдан сатып бермекчи болгон. Андан сырткары, НАТОнун башкы катчысы Марк Рютте бул ишти колго алары кабарланган.