БИШКЕК, 11-сен. — Sputnik. АКШдагы консерватор саясатчы Чарли Киркти чак түштө, Юта университетиндеги иш-чарада сүйлөп жатканда атып кетишти. Бул туурасында РИА Новости жазды.
Социалдык тармакка тараган видеолордон ал сахнада бейкапар сүйлөп жатып, тарс эткен үндөн кийин кулап баратканын көрүүгө болот.
Ал эми дагы бир видеого сүйлөп бүтүп, микрофонду ылдый түшүрө бергенде мойнунун сол жактагы күрөө тамыры жакка ок тийип, кан жайыла бергени түшүп калган.
АКШнын бир нече ЖМКлары жетип келген дарыгерлер аны сактап кала албагандыгын жазышты. Бир аз өтпөй эле президент Дональд Трамп анын каза тапканын билдирди.
NBC телеканалы кабарлагандай, кол салууга шектүү колго түшүрүлүп, бирок көрсөтмө берүүдөн баш тарткан. Кол салууга демократтарды колдоп жүргөн Майкл Маллинсон шектелип кармалып, бир аздан кийин бошотулганын жазышты.
Университеттин өкүлү журналисттерге ок аткан адам дагы деле эркиндикте жүрөт деген маалымат берген.
Кирк деген ким эле
Ал коомчулукка Киев бийлигин сындап, Украинага жардам көрсөтүүгө каршы чыгып жүргөн адам катары таанымал болчу. Россия менен алаканы, дипломатиялык мамилени калыбына келтириш керек деген багытты жактап келген.
Трамптын "Биринчи Америка болушу керек" деген саясатын колдогон.
2012-жылы Кирк Turning Point USA уюмун негиздеген. Ал уюм окуу жайларда консервативдик баалуулуктарды жайылтуу багытын алган. Кирк АКШ университеттериндеги "ачык микрофон" форматындагы жолугушуулары менен белгилүү. Анын социалдык тармактарындагы баракчаларына 20 миллиондон ашуун колдонуучу катталган. Көбүнчө демократиялык партиянын тарапташтары менен талашып-тартышкан видеолору көрүүчүлөрдү топтогон.