Россия тарап күйүүчү майды үзгүлтүксүз жеткирүүгө кепилдик берген. Бул тууралуу министрлер кабинетинин төрагасынын биринчи орун басары Данияр Амангелдиев "Биринчи радионун" эфиринде билдирди. Анын айтымында, Чолпон-Атадагы саммитте минкаб башчысы Адылбек Касымалиев россиялык кесиптеши Михаил Мишустинден күйүүчү майды үзгүлтүксүз жеткирүүгө кепилдик алган. "Нефтетрейдерлердин запасы 1,5 айга жетет. Аны эки айга чейин көбөйтүүгө мүмкүнчүлүк бар. Кандайдыр бир кыйынчылыктар болсо, өкмөт көмөк көрсөтүүгө даяр", — деген Амангелдиев. Өкмөт өкүлү өлкө керектеген күйүүчү-майлоочу майдын 98 пайызы Россиядан келерин айткан. Ага болгон баа дүйнөлүк рыноктогу абалга жараша өзгөрө турганын белгилеп, Монополияга каршы жөнгө салуу кызматы бааны турукташтыруу боюнча түздөн-түз нефтетрейдерлер менен иш жүргүзөрүн кошумчалаган.
Жалал-Абад шаарын Манас деп өзгөртүүгө болжол менен 15 миллион сом кетет. Бул тууралуу министрлер кабинети кабарлады. Каражатты демилгечи катары Жалал-Абад шаардык мэриясы бөлүп, “Жалал-Абад” флагштогу менен мөөрлөрдү алмаштырууга, шаардагы белгилерди, аталыштарды, почта дарегин өзгөртүүгө, шаардык кызматтардын жана уюмдардын кызмат орундарын каттоого жумшалат. Шаар бийлигине бул ишти бүтүрүү үчүн алты ай убакыт берилет. Бүгүн Жогорку Кеңештин тиешелүү комитети атын өзгөртүү боюнча мыйзам долбоорун үч окууда жактырды. Документ шашылыш каралып, ушул аптада парламенттин жыйынында каралышы мүмкүн.
ЕАЭБдин азык-түлүк коопсуздугун жогорулатуу үчүн үрөндүн жалпы рыногу жакшыртылууда. Бул тууралуу Евразия экономикалык комиссиясынан билдиришти. Биримдикке кирген мамлекеттерде атаандаштыкка жөндөмдүү буудай, арпа, жүгөрү, картошка, күн карама, помидор, бадыраң, беденин сорттору жана кант кызылчасынын гибриддери бар. Бул багытта 2017-жылы уюмдун алкагында үрөн жүгүртүүгө байланыштуу келишим кабыл алынган. Ал жалпы үрөн рыногун өнүктүрүүнүн негизги максаты ЕАЭБ өлкөлөрүнүн азык-түлүк коопсуздугун жогорулатуу экенин белгилеген.
Бүгүн, 9-сентябрда Кыргызстанда улуттук маданиятты даңазалаган Комуз күнү белгиленди. Маданият, маалымат жана жаштар саясаты министрлигинин маалыматына караганда, бул күнү өлкө боюнча музыкалык жана искусство мектептеринде, ошондой эле маданий мекемелерде майрамдык иш-чаралар өтүүдө. Талас, Нарын, Ысык-Көл, Ош, Баткен, Жалал-Абад жана Чүй облустарындагы ондогон мектептерде жана маданий жайларда комузчулардын чыгыштары, элдик фольклордук ансамблдердин концерттери уюштурулуп, улуттук күүлөр жаңырып жатат. Майрамдык иш-чаралар Жайыл, Жумгал, Каракол, Кара-Суу, Өзгөн, Кызыл-Кыя, Аксы жана Кадамжай өңдүү аймактарда да кеңири белгиленип, жаш муунга комуздун тарыхый жана маданий мурастуулугу таанытылды.