Жакында Бишкекке Asman Airlines компаниясынын үчүнчү учагы келет. Бул тууралуу "Кыргызстан аэропорттору" ишканасынын басма-сөз кызматынан кабарлашты. Маалыматка ылайык, жакында Бишкекке Asman Airlines компаниясынын үчүнчү учагы келери күтүлүп жатат. Кыргызстан ички каттамдар үчүн Bombardier Dash 8 Q400 үлгүсүндөгү төрт учак сатып алмак. Анын биринчиси 2024-жылы 6-сентябрда борбор калаага келип конгон. Ал эми ошол эле жылдын 29-октябрында экинчиси келген. Канадада чыгарылган бул учактар кыска аралыкка учуп, 80 жүргүнчүгө ылайыкташкан.
Эми аксакалдар сотунун чечимине каршы арыз берсе болот. Бул тууралуу Мамлекеттик кызмат жана жергиликтүү өз алдынча башкаруу иштери боюнча мамлекеттик агенттигинин жергиликтүү өз алдынча башкарууну өнүктүрүү башкармалыгынын башчысы Бактыярбек Жээнбаев билдирди. Анын айтымында Жарандык процессуалдык кодекске өзгөртүү киргизилип, жаңы мыйзам кабыл алынды. Ага ылайык, эми аксакалдар сотунун чечимине макул болбогон тараптар ошол чечимди райондук же шаардык сотко кайрылып, кайра карата алышат. "Аксакалдар соту тарабынан жалпы 1 525 иш каралган. Анын ичинен 130 иш чечилбей сот органдарына өткөрүп берилген. Бүгүнкү күндө өлкө боюнча жалпы 425 аксакалдар соту бар. Анын 2 496 мүчөсү болсо, 73 пайызын эркектер, 27 пайызын аялдар түзөт. Ар бир аксакалдар сотунун үчтөн кем эмес, тогуздан жогору эмес мүчөсү болушу керек", — деди Жээнбаев.Ал ошондой эле аксакалдар сотуна жашаган аймагында сый-урматка ээ, кадыр-барктуу, соттуулугу жок жана курагы 50 жаштан кем эмес адам мүчө боло аларын кошумчалады.
Чүй облусунун Аламүдүн районундагы Арашан — Чуңкурчак унаа жолун оңдолуп, асфальттоо иштерине даярдык көрүлүүдө. Бул тууралуу Транспорт жана коммуникациялар министрлигинен билдиришти. Маалыматта 22 чакырым жолду кеңейтүү иштери аяктап, суу өткөн түтүктөр орнотулуп, көпүрөнүн негизги конструкциялары жасалып, асфальт басууга даярдоо иштери уланып жатканы айтылат."Жолдун сапаттуу оңдолуп, асфальтталышы туристтер үчүн ыңгайлуу шарт түзүп, айдоочулардын коопсуздугун камсыз кылат", — деп айтылат маалыматта. Мындан тышкары, жолду кышка чейин бүткөрүү пландалып жатканы айтылды.
Экинчи дүйнөлүк согуш жана Япониялык баскынчыларга каршы согуштагы жеңиштин 80 жылдыгын майрамдоого арналган иш-чараларга катышуу үчүн Пекинге 26 чет элдик лидер барат. Бул тууралуу Кытайдын борбордук телеканалы билдиргенин РИА Новости жазды. Маалыматта меймандар 3-сентябрь күнү Тяньаньмэнь аянтында Жеңиштин 80 жылдыгына арналган аскердик парадга күбө болушат. Белгилей кетсек, аталган салтанат Тяньцзин шаарында өтө турган Шанхай кызматташтык уюмуна мүчө мамлекеттердин саммитин улай болмокчу. Ага Кыргызстандын президенти Садыр Жапаров да чакырылган. Күз айынын башы менен Пекинге Россия, Түндүк Корея, Пакистан, Иран, Казакстан, Кыргызстан, Өзбекстан, Түркмөнстан, Тажикстан, Беларусь, Азербайжан, Армения, Сербия, Словакия, Индонезия, Малайзия, Куба, Камбоджа, Вьетнам, Лаос, Непал, Монголия, Мальдив аралдары, Конго, Зимбабве, Мьянманын лидерлери чогулат.