Кумтөр кени толук мамлекетке өткөндөн бери жалпы 3 миллиард 445 миллион доллар киреше тапты. Бул тууралуу президент Садыр Жапаров Барскоондо алтынды жер астынан казуу долбоорунун башталышына арналган иш-чарада сүйлөп жатып билдирди. Өлкө башчысы мамлекеттик бюджетке салык жана башка төлөмдөр түрүндө эле 891 миллион 600 мин доллар төлөнгөнүн, бул мезгил ичинде жалпы 54 тоннадан ашуун алтын өндүрүлгөнүн айткан. "Ишкана 2021-жылдын май айынан бүгүнкү күнгө чейин 3 миллиард 445 миллион доллар киреше тапты. Андан түшкөн акчага мамлекеттик ипотеалык үйлөр, жол, мектеп, бала бакчалар салынууда. Эмгек акылардын, пенсия-пособиелердин көбөйүшү, аскердик жана башка заманбап техникалардын сатып алынышы, иши кылса өлкөдө болуп жаткан жакшы иштердин баарына Кумтөрдөн түшкөн акча жумшалып жатат", — деп белгилеген Жапаров. Ал кенди чет өлкөлүк компания иштеткен 28 жыл ичинде үлүштүк киреше же дивиденд түрүндө болгону 100 миллион доллар түшсө, мамлекетке өткөн үч жылдан бери 441 миллион доллар дивиденд алынганын кошумчалады.
Кыргызстандагы Жеңиш чокусунда калып кеткен россиялык альпинист Наталья Наговицына дайынсыз жоголду деп эсептелет. Бул туурасында ӨКМдин маалымат катчысы Адил Чаргынов Sputnik агенттигине айтты. "Учурда ал каза болгону же тирүү экени белгисиз, мындан улам дайынсыз жоголду деп эсептелет", — деди ал. Россиялык альпинист Наговицына 2025-жылдын 12-августунда аталган чокудан түшүп жатып бутунан жаракат алган. Эртеси күнү ага жардамга эки альпинист көтөрүлүп, азык-түлүк жана жабдыктарды таштап, кайра түшүүгө мажбур болушкан. Жолдо алардын бири каза болуп калган. 16-августта окуя болгон жерге Кыргызстандын Коргоо министрлигинин куткаруучу тик учагы жөнөтүлгөн, бирок аба ырайынын начардыгынан улам кырсыктап, эки адам жабыркаган.
Жалал-Абад шаарында "Эко такси" кызматы жана электр унааларын кубаттоочу жай ачылды. Бул тууралуу мэриядан билдиришти. Маалыматка ылайык, "Эко такси" кызматы үчүн 30 даана электр унаалары сатып алынып, 10 даана электр унааларын кубаттоочу жабдуулар орнотулду. Электр унааларын кубаттоочу жайлардын ачылуу аземинде экологиялык маселелерди чечүүгө жана шаар тургундары үчүн ыңгайлуу шарттарды түзүүгө багытталган долбоорлорду шаар бийлиги ар дайым колдой тургандыгы айтылды.
Батыш өлкөлөрү Россияга каршы экинчи фронт ачылса, Грузияга курал берүүнү убада кылышты. Бул тууралуу бийликте турган "Грузин кыялы" париясынын башкы катчысы, Тблиси шаарынын мэри Каха Каладзе билдиргенин РИА Новости жазды. "Премьер-министрдин кеңсесинде экинчи фронт ачуу боюнча түз коркутуулар, опуза жана кемсинтүүлөр болду. "Биз толук жардам беребиз, тиешелүү техника менен камсыз кылабыз" деген убадалар айтылды. Албетте, буга далилдер бар, зарыл болгон учурда биз аларды пайдаланабыз. Бирок өлкөнүн кызыкчылыгы үчүн азыркы абалда калганыбыз дурус", — деп белгилеген Каладзе. Саясатчы батыштагы өнөктөштөр Грузияны опузалоосун улантып жатканын эске салды. Бул жолу алар "Евробиримдик менен визасыз режимди токтотобуз" деп коркутуп жатышканын айтты.