Башкы прокуратура алимент төлөөдөн баш тарткандарды камоону сунуштап жатат. Тиешелүү мыйзам долбоору коомдук талкууга чыгарылды. Сөз соттун чечимдери же алименттик келишимдер аткарылбай калган учурларга байланыштуу болууда: эгер ата-эне балдарын же бойго жеткен, бирок эмгекке жарамсыз балдарын багууга каражат төлөөдөн баш тартып, жыл ичинде карызын үч ай катары менен төлөбөсө, үч суткага камоо сунушталууда; кайрадан мыйзам бузган учурда жети суткага камоо каралат; балдар эмгекке жарамсыз жана жардамга муктаж ата-энесин үч ай катары менен багуудан баш тартса, үч суткага камоо демилгеленип жатат.
18-сентябрда Бишкекте кыргыз-түрк бизнес форуму өтөт. Бул тууралуу Инвестициялар боюнча улуттук агенттиктен билдиришти. Форум эки өлкөнүн мамлекеттик түзүмдөрүнүн, ишкер чөйрөлөрүнүн өкүлдөрүн жана инвестициялык компанияларын бириктирет. Иш-чара экономиканын негизги тармактарындагы биргелешкен долбоорлорду талкуулоо жана илгерилетүү үчүн аянтча болмокчу. Анын ичинде төмөнкү багыттар бар: соода жана инвестиция; өнөр жай жана өндүрүш; транспорт жана логистика; энергетика жана анын кайра жаралуу булактары; айыл чарба жана кайра иштетүү; курулуш жана инфраструктура; туризм жана мейманкана ишкердиги; билим берүү, илим жана санариптик технологиялар. Бизнес-форумдун алкагында B2B жана B2G форматындагы жолугушуулар каралып, инвестициялык долбоорлордун бет ачары, жаңы өнөктөштүк байланыштарды түзүү жана кыргыз-түрк кызматташтыгынын келечектүү багыттары талкууланат.
Уланмырза Карыпбаев С. Ибраимов атындагы Ош улуттук драма театрынын көркөм жетекчиси болуп дайындалды. Бул тууралуу Маданият, маалымат жана жаштар саясаты министрлиги билдирет. Уланмырза Карыпбаевди театрдын жамаатына министр Мирбек Мамбеталиев тааныштырып, албан ийгиликтерди жана даңгыр жол каалады. Уланмырза Карыпбаев 2014-жылы «Тунгуч» жаштар театрынын алдындагы студиянын бүтүрүүчүсү. 2020-жылы Санкт-Петербургдагы Россия мамлекеттик театр искусствосу институтун «театралдык режиссура»адистиги боюнча артыкчылык диплому менен аяктап жана Екатеринбург мамлекеттик театр институтунун «Маданият жана искусство тармагындагы менеджмент» адистиги боюнча кесиптик кайра даярдоо курстарын бүтүргөн. Бул жылдар аралыгында Кыргызстан, Казакстан, Беларусь, Россия жана Түштүк Кореянын театрларында 45ке жакын спектакль койгон.
Кыргызстанда 2025-жылкы ID-карта жана жалпы жарандык паспорт колдонууга берилет. Минкабдын токтомуна ылайык, алар 2024-жылкы ID-карталар жана 2023-жылкы паспорттордун бланктары түгөнгөндө пайдаланыла баштайт. Паспортторду персонификациялоо милдети президенттин иш башкармалыгынын карамагындагы "Кызмат" мекемесине жүктөлдү.**Евробиримдик Россиянын тоңдурулган каражатынан түшкөн кирешеден Украинага 10,1 миллиард евро бөлгөн. Бул тууралуу Еврокомиссиянын маалыматына таянып Welt am Sonntag басылмасы жазганын РИА Новости кабарлады. Маалыматка ылайык, бул РФ Борбордук банкынын январдан июлга чей