БИШКЕК, 23-авг. — Sputnik. Жеңиш чокусунда калган россиялык альпинист Наталья Наговицынаны куткаруу иштери аба ырайынын кескин төмөндөп кеткендигине байланыштуу толугу менен токтотулду. Бул тууралуу ӨКМ Ak-Sai Travel туристтик компаниясына таянып билдирди.
Министрлик чокуга бараткан куткаруу тобу тик учак менен түштүк Эңилчектеги базага, ал эми куткаруу тобунун белинен жаракат алган башчысы "Каркыра" лагерине жайгаштырылганын, бүгүн алар Бишкекке алып келинерин кошумчалады.
12-августта Россиялык альпинист Наталья Наговицынанын Жеңиш чокусунан түшүп келе жатканда буту сынып, бийиктикте калып калган. Анын шериги жабыркаган альпинистке биринчи жардам көрсөтүп, коопсуз жерге жайгаштырып, жардамга башкаларды чакырыш үчүн лагерге түшкөн. 13-августта ал лагердеги Италия менен Германиядан келген альпинисттер Наговицынага көтөрүлүшкөн. Ага жетип, уктоочу мүшөк, азык-түлүк, газ баллон таштап, аба ырайынын катаалдыгынан улам кайра түшүүгө мажбур болушкан. Жолдо италиялык альпинисттин абалы капыстан кескин начарлап, 15-августта каза болгон (чокудагы абанын басымынан улам мээси шишип кеткен болушу мүмкүн деген маалыматтар айтылды).
Өткөн жумада Жеңиш чокусундагы адамдарга бараткан Кыргызстандын Коргоо министрлигинин Ми-8 тик учагы кырсыктаган. Катаал аба ырайына байланыштуу тик учак тоого конууга аргасыз болгон. Борттогу бир нече адам жаракат алган.