БИШКЕК, 21-авг. — Sputnik. Жогорку Кеңештин депутаты Дастан Бекешев таштандыны тыюу салынган жерге таштагандарды тарбиялоо жолун сунуштады.
Ал Кыргызстандын мыйзамдарына төмөнкүдөй өзгөртүүлөрдү киргизүү керек деп эсептейт:
тиричилик таштандыларын таштагандарга эскертүү берүүнүн ордуна 20 сааттык коомдук жумушка тартуу;
өндүрүш, өнөр жай жана медициналык таштандыларды таштагандарды, таштандыларды же жалбырактарды өрттөгөндөрдү 20-30 сааттык коомдук жумуштарга тартуу.
Мында айып пул төлөө шарты дагы сакталып калат.
Демилгечи мунун артыкчылыктарын санады:
адилеттүүлүк принциби — эреже бузган адам өзү булгаган аймакты тазалайт;
төлөнбөгөн айып пулдардын санын жана аларды өндүрүүгө кеткен мамлекеттик чыгымдарды кыскартуу;
таштандыларды башкаруу чөйрөсүндө тартипти чыңдоо жана таштанды башаламан төгүлгөн жайларды азайтуу.
Бекешев тарбиялык аракеттердин аркасында жарандар мыйзамды кайрадан бузууга барбайт деп үмүттөнөт.