Алты жогорку квалификациялуу дарыгерлерден турган Россиянын “РЖД-Медицина” клиникалар тармагынын өкүлдөрү “Миссия Добро” программасынын алкагында Бишкекке келишет. Бишкектеги орус үйүнүн маалыматына ылайык, “РЖД-Медицина” клиникалар тармагынын ыктыярчы дарыгерлери Москва, Красноярск, Самара жана Чита шаарларынан келип, 18-22-август күндөрү Бишкекте иш алып барышат. Алардын катарында уролог, жүрөк-кан тамыр хирургу, кардиолог, акушер-гинеколог, нефролог жана травматолог-ортопед бар. Дарыгерлер медициналык борборлорду кыдырып, кесиптештери жана медициналык ЖОЖдордун студенттери үчүн мастер-класс, лекцияларды өткөрүп тегерек столдорго катышат. Ошондой эле бейтаптарды текшерип, кеңеш беришет.Россиядан келген адистер Улуттук госпиталь, Жүрөк хирургиясы жана органдарды трансплантациялоо илим-изилдөө институту жана Адамдын репродукциясы боюнча кыргыз илимий борборунун дарыгерлери менен биргеликте иш алып барышат.
Кыргызстанда эттин баасын негизсиз көтөргөндөргө чара көрүлөт. Бул тууралуу Суу ресурстары, айыл чарба жана кайра иштетүү өнөр жайы министрлигинен билдиришти. Министрлер кабинетинин төрагасынын орун басары - айыл чарба министри Бакыт Төрөбаев Ветеринария, мал чарбасын өнүктүрүү, жайыт жана тоют кызматы, райондук агрардык өнүктүрүү башкармалыктарына жер-жерлерде (район, шаарларда) мал этинин баасын тынымсыз көзөмөлдөп туруу, эгерде мамлекеттик көзөмөл киргизилгенден кийин эттин баасы негизсиз көтөргөн учурлар катталган болсо тийиштүү чараларды өз убагында көрүү боюнча конкреттүү тапшырмаларды берди. Белгилей кетсек, өлкөдө 11-августтан тарта эттин баасына 90 күнгө мамлекеттик көзөмөл киргизилген. Мындай чечим баанын негизсиз кымбатташына жол бербөө жана калк үчүн продукциянын жеткиликтүүлүгүн камсыз кылуу максатында кабыл алынган. Ошондон улам Бакыт Төрөбаевдин дагы бир тапшырмасына ылайык Экономика жана коммерция министрлигине караштуу Монополияга каршы жөнгө салуу кызматына эттин чекене баасын көзөмөлдөп туруу боюнча тапшырманы коюп, ага ылайык, этке болгон баа 700 сомдон төмөн болушу керек болчу.
Кыргыз Республикасында Казакстан кино күндөрү 20-августтан 22-августка чейин өтөт. Бул тууралуу Кыргыз Республикасынын Маданият министрлиги маалымдады.Маалыматка ылайык, аталган күндөрү Бишкек шаарындагы Ала-Тоо кинотеатрында белгилүү казакстандык режиссерлор тарткан көркөм фильмдер көрсөтүлөт. Ар бир көрсөтүүдөн кийин көрүүчүлөр тасманын жаратуучулары менен ачык талкууга катыша алышат.Программа:20-август, 18:00 – Казак хандыгы. Алтын так (реж. Рүстем Абдрашев);21-август, 14:00 – Набат операциясы (реж. Рашид Сулейменов);22-август, 11:00 – Жамбыл. Жаңы доор (реж. Жандос Кусаинов). Бардык көрсөтүүлөр акысыз.Иш-чара Казакстан Республикасынын Маданият жана маалымат министрлигине караштуу кинематография департаментинин, Шакен Айманов атындагы "Казакфильм" акционердик коомунун жана Казакстан Республикасынын Кыргызстандагы Элчилигинин колдоосу менен уюштурулууда.