Чолпон-Атада ЕАЭБдин өкмөттөр аралык кеңешинин жыйыны башталдыЖМК Трамп Зеленский бардык көйгөйдүн себепкери деген ойдо турганын жаздыЫсык-Көлдө Касымалиев менен Мишустин жолукту. Алдыда кененирээкМинистрлер кабинетинин төрагасы Адылбек Касымалиев Кыргызстанга келген Россиянын өкмөт башчысы Михаил Мишустин менен Ысык-Көлдө сүйлөшүүлөрдү жүргүздү. Касымалиев жолугушууда Владимир Путиндин ушул жылдын ноябрында өтчү ЖККУ саммитине келишин чыдамсыздык менен күтүп жатышканын айтты. Ал ошондой эле эки өлкөнү достук, маданий-гуманитардык байланыштар жана жакшы коңшулук мамилелер байланыштырып турарын белгиледи. "Жыл сайын биздин шаарлар менен аймактардын ортосунда боордоштук байланыштар түзүлүүдө. Эки өлкөнүн аймак башчыларынын өз ара сапарлары үзгүлтүксүз жүргүзүлүп турат. Былтыр товар жүгүртүү 3,9 миллиард долларды түздү. Тараптар белгиленген 5 миллиард долларлык көрсөткүчкө ишенимдүү жакындап келе жатат. Быйыл Россиянын колдоосу менен Москва шаарында Кыргыз илим жана маданият үйүн да ачуу пландалууда", — деди Касымалиев. Ал ошондой эле Кыргызстандын ЖККУдагы жана келерки жылы ШКУдагы төрагалыгы Россия менен кызматташтыкты дагы да бекемдөөгө мүмкүнчүлүк түзөрүн белгиледи. Ал эми Мишустин Россия Кыргызстан менен болгон боордоштук мамилелерди жогору баалап, бардык багыттар боюнча кызматташтыкты арттырууга даяр экенин айтты.
Ысык-Көлдүн Чолпон-Ата шаарында ЕАЭБдин өкмөттөр аралык кеңешинин жыйыны башталды. Анда жалпысынан 20 маселе каралат. Төртөө ушул тапта башталган тар чөйрөдө каралса, калган 16сы эртең, 15-августта, өтө турган кеңири курамда каралат. Жыйында жылдык отчеттор, мунай жана газдын жалпы рынокторун түзүү жөнүндө баяндамалар талкууланары айтылды. Мындан тышкары, ЕАЭБ алкагында транспорт саясатын өркүндөтүү, логистиканы жакшыртуу, Кытай менен темир жол ташууларын санариптештирүү маселелери бар. ЕАЭБди 2025-жылга чейин өнүктүрүүнүн стратегиялык багыттарын ишке ашыруу темасы да каралат. Ошондой эле климаттык саясат, медициналык буюмдар жана дары-дармектин жалпы рыногун түзүү, коопсуздук жана сапат боюнча бирдиктүү талаптарды киргизүү талкууланмакчы.
АКШ президенти Дональд Трамп, кыязы, азыркыга чейин Владимир Зеленскийди Украинадагы согушту жөнгө салууга жолтоо болгон негизги көйгөй катары көрүп жатат. Бул туурасында Financial Times басылмасы ысымын атагысы келбеген аткаминерге таянып жазды. Трамп менен Зеленскийдин мамилеси февралдагы кайым айтышуудан кийин суук селки тартып кеткен. "Украин аткаминерлери Ак үйдүн кожоюну Аляскада Путин менен түзө турган келишимге макул болууга Киев бийлигинин башчысына мурдагысындай эле басым жасоого аракет кылышы мүмкүн деп бир топ түйшөлүп турушат", — деп жазган басылма.ЭМИ ВАЛЮТА КУРСУ МЕНЕН ТААНЫШЫП АЛЫҢЫЗДАР Улуттук банктын билдирүүсү боюнча ушул тапта: 1 АКШ доллары 87 сом 35 тыйынга евро 102 сом 33 тыйынга рубль 1 сом 9 тыйынга Казак тенгеси 16 тыйынга барабар МУНАЙ БААСЫ Бишкекте орточо эсеп менен алганда Аи 92 үлгүсүндөгү бензин 68 сом 40 тыйындан баштап, 69 сом 80 тыйынга чейин, Аи 95 үлгүсүндөгү күйүүчү май 74 сом 90 тыйындан 75 сом 90 тыйынга дейре, дизель майы 75 сом 40 тыйындан тарта 75 сом 80 тыйынга чейин, ал эми унаа газынын литри 38 сомдон сатылууда.АБА ЫРАЙЫ15-августка караган түнү жаан-чачын күтүлбөйт. Батыштан соккон шамалдын ылдамдыгы секундасына 4-9 метрге жетет. 15-август, жума күнү күндүз тоолуу райондордо жаан жаайт, дыйканчылык аймактарда күн ачык болот. Мындай маалыматты Кыргызгидромет таратты. Абанын температурасы Чүй, Ош, Жалал-Абад облустарында +30...+35, Таласта +26...+31, Баткен өрөөнүндө +29..+34, Ысык-Көл жергесинде +29...+29, Нарын аймагында +25...+30 градус ысык болот. Күндүн табы борбор калаада жана Ош шаарында +32...+34 градуска көтөрүлсө, Чолпон-Атада +24...+26га чейин жетет.