БИШКЕК, 13-авг. — Sputnik. Дэн Сяопин проспектиндеги жол оңдоо иштери 2025-жылдын ноябрь айында аяктайт. Бул тууралуу Бишкек мэриясынын Транспорт жана жол-транспорттук инфраструктураны өнүктүрүү департаменти билдирди.
"Дэн Сяопин проспектинин жабылышынан улам пайда болгон жол тыгындары убактылуу көрүнүш. Бүгүн жолдун жабылганына эки эле күн болгондуктан тыгын жаралышы мүмкүн", — деди калаа бийлиги.
Учурда атайын техника тартылып, көчөнү капиталдык оңдоого даярдоонун алкагында геодезиялык изилдөө жүргүзүлүүдө.
Буга чейин Бишкекте 12-августтан тарта Дэн Сяопин проспектин оңдоо иштери башталары кабарланган. Биринчи этапта автоунаалардын кыймылы үчүн Фучик көчөсүнөн Интергельпого чейинки тилке, ошондой эле Алыкуловдон Кустанай көчөсүнө чейинки жолдун түштүк тарабы жабылат.