БИШКЕК, 6-авг. — Sputnik. АКШнын президенти Дональд Трамп өлкөсүн украин чатагынан алып чыгып кетүү туурасында ойлонуп жатат. Бул туурасында РИА Новости жазды.
"Бул — Байдендин эмес, менин согушум. Мамлекетти алып чыгып кетүү үчүн ушул жердемин", — деген ал Ак үйдө журналисттер менен сүйлөшүп жатканда.
Трамптын айтымында, Американын администрациясы жан үрөп иштеп жатат, Ак үйдүн башчысы өзү да Украинанын айланасындагы кырдаалды чечүү аракетинде.
"Көп согушту токтотком. Бул дагы мен күч жумшап, аракет кылган жаңжалдын бири", — деген президент.
Журналисттердин Москвага карата салынышы ыктымал болгон санкциялар туурасындагы суроосуна жооп берип жатып Трамп чечимди Россия менен АКШнын шершемби күндөн кийинки жолугушуусунан соң кабыл аларын айткан.
Буга чейин Reuters агенттиги маалымат булактарына таянып, АКШ президентинин чабарманы Россияга 6-августта келерин айткан эле. Бул дипломаттын жыл башынан берки бешинчи сапары болмокчу. Соңку ирет 11 жана 25-апрелде келип, РФ лидери Владимир Путин менен жолуккан.
"Эртең биз Россия менен жолугабыз. Эмне болорун көрөбүз. Андан кийин гана чечим кабыл алынат", — деген Трамп.
Россиядан энергоресурстарды сатып алган мамлекеттерге 100 пайыздык бажы төлөмү салынышы мүмкүн деген маалыматка комментарий берген Трамп буга чейин эч качан конкреттүү пайыздык ставка киргизем деп айтпаганын билдирди.
Өткөн аптада ал РФке салынчу кошумча чектөөлөрдүн майнаптуу болорунан шек санаган эле. Америка лидери 14-июлда Москвадан Киев менен тынчтык келишимин түзүүнү талап кылып, 50 күндүк шарт койгон. Кийинчерээк мөөнөттү 10-12 күнгө чейин кыскартканын билдирген. Эгерде бул талап аткарылбаса россиялык товарлардын импортуна 100 пайыздык тариф киргизерин, ошондой эле андан мунай, газ жана башка энергетикалык ресурстарды сатып алган өлкөлөргө кошумча бажы алымын саларын айткан.