БИШКЕК, 30-июл. — Sputnik. АКШнын президенти Дональд Трамп Украинадагы ок атышууну токтотуу боюнча макулдашууга жетүү үчүн он күн убакыт берди. Бул тууралуу РИА Новости жазды.
Трамп эгер сүйлөшүүлөр ийгиликсиз болсо тиешелүү чаралар көрүлөрүн белгилеп, бирок алар таасир береринен күмөн санаган.
Трамптын билдирүүлөрүнүн урунттуу учурлары:
Россияга каршы санкциялар мунай рыногуна таасир этет деп тынчсызданбайт. Анткени АКШда мунайдын кору бар жана өндүрүштү көбөйтүүгө мүмкүнчүлүк жетиштүү;
Москвадан 10–12 күн ичинде Украинадагы ок атышууну токтотуу боюнча чакырыкка реакция болбогону "өкүндүрө турган" көрүнүш;
Трамп Владимир Путин менен сүйлөшүүлөрү "абдан жакшы өткөнүн" белгилеп, айрым учурларда Украина боюнча келишимге жетиштик деп үч-төрт жолу ишенгенин айтты.
14-июлда Дональд Трамп Москвага 50 күндүк ультиматум коюп, Киев менен тынчтык келишимине жетишүүнү талап кылган. Бирок кечээ бул мөөнөттү 10–12 күнгө чейин кыскартканын билдирди.
Эгер бул талаптар аткарылбаса, анда Россиядан келген бардык товарларга 100 пайыздык импорттук бажы төлөмдөрүн киргизерин жана Россиядан мунай, газ жана башка энергия булактарын сатып алган өлкөлөргө кошумча санкциялар салынарын жарыялаган.