Гимндин жаңы текстинин беш варианты тандалып, алардын музыкасына 8-сентябрга чейин сынак жарыяланды. Бул тууралуу Маданият, маалымат жана жаштар саясаты министрлиги билдирди.Маалыматка караганда, 25-июлда, мамлекеттик гимндин жаңы редакциядагы текстинин жана музыкасынын мыкты долбоорлорун тандоо боюнча ведомстволор аралык комиссиянын төртүнчү отуруму өттү. Анда 16-июндан 17-июлга чейин келип түшкөн 132 сунуш каралган.Эми сынактын экинчи этабында бул тексттерге музыка тандалат. Композитор, ырчы, музыканттар сунуштарын 8-сентябрга чейин Маданият министрлигине, Пушкин, 78 дарегине жөнөтсө болот. Комиссия анын ичинен мыкты делген үч вариантты иргеп алып, Жогорку Кеңештин кароосуна киргизет.
2025-жылдын январь-май айларында ЕАЭБ өлкөлөрүнүн арасында курулуш иштеринин көлөмү боюнча эң жогорку өсүштү Кыргызстан көрсөттү. Бул тууралуу Евразия экономикалык комиссиясынын маалыматында айтылган. Көрсөткүч 1,9 эсеге жогорулаган. Курулуш тармагындагы өсүш союздун башка өлкөлөрүндө дагы, тагыраагы, Арменияда (29%), Казакстанда (15,4%), Беларуста (12,3%) жана Россияда (5,5%) байкалган. Евразия экономикалык биримдигине мүчө мамлекеттерде курулуш иштеринин көлөмү январь-майда жалпысынан 6,8 пайызга өскөн.
Жыл башынан бери Баткенде 446 үй-бүлө социалдык келишим түздү. Облустагы өкүлчүлүктөн билдиришкендей, 2025-жылга карата социалдык келишим боюнча Баткен облусуна бөлүнгөн квотанын жалпы саны 2054 үй-бүлөнү түзөт. Бүгүнкү күнгө карата жалпы 446 үй-бүлөгө келишим түзүлүп, 150 000 сомдук сертификаттар тапшырылды.
Беларустук кибер-алдамчылар акча каражаттарынын 5,6 пайызын Кыргызстанга которушкан. Беларустун Тергөө комитетинин маалыматына ылайык, кибер-алдамчылык жолу менен жарандарды алдап тапкан акчалардын 5,6 пайызы Кыргызстандагы банк эсептерине которулган. Бул маалымат 2025-жылдын экинчи кварталында белгилүү болгон. Кибер-алдамчылар алдап тапкан акчалардын эң чоң бөлүгү — 47,2 пайызы — Россияга жөнөтүлгөн. Кыргызстандан тышкары, акчалар Өзбекистанга жана Словакияга 5,9 пайыздан, Тажикстанга 5,8 пайыз которулган. Кыргызстан 5,6 пайыз менен алардын катарына кирген. Мындан сырткары, алдамчылар жарандардын акчаларын Вьетнам, Малайзия, Люксембург, Израиль жана Чилидеги банк эсептерине да чыгарышкан. Беларустун Тергөө комитети жарандарды сак болууга чакырып, алдамчылар көп учурда SMS же мессенжер аркылуу "бонус", "посылка" же "арзандатуу" тууралуу жалган билдирүүлөрдү жиберишерин эскертет. Ал билдирүүлөрдө шилтемеге өтүп, жеке маалыматтарды киргизүү талап кылынат. Ушундай жол менен кылмышкерлер адамдарды торго түшүрүшөт.