БИШКЕК, 27-июл. — Sputnik. Кыргызстан менен Россиянын тышкы иштер министрлери Жээнбек Кулубаев жана Сергей Лавров өлкөлөр ортосундагы түбөлүктүү достук, союздаштык жана өнөктөштүк жөнүндөгү Декларацияга кол коюлгандыгына 25 жыл толгонуна байланыштуу бири-бирин куттуктады.
Кыргыз министри кыска убакыт аралыгында эки тарап ортосунда бекем мамлекеттик байланыштарды түзүү боюнча арбын иштер аткарылганын белгиледи.
Ал Кыргызстан менен Россиянын көптөгөн негизги, маанилүү эл аралык маселелер боюнча окшош же бирдей мамилелери калыптанганына токтолду.
"Эки элдин бакубатчылыгы жана гүлдөп-өсүшү үчүн ар тараптуу кызматташтыкты өнүктүрүү жана тереңдетүү багытында сиздин туруктуу колдооңузга жана көмөгүңүзгө ишенем", — деп айтылат Кыргызстандын Кулубаевдин катында.
РФ ТИМ башчысы Лавров өзүнүн куттуктоосунда акыркы чейрек кылым ичинде орус-кыргыз мамилелери сапаттуу жаңы деңгээлге чыккандыгын белгилеген.
Ал мамлекеттер ортосундагы алакада кылымдарды камтыган жалпы тарых жаткандыгын, анын ичинен өзгөчө орунду Улуу Ата Мекендик согуштагы Жеңиш ээлей тургандыгына токтолгон.
"Кызматташуунун ажырагыс бөлүгү — Борбор Азияда жана жалпы Евразия чөлкөмүндөгү тынчтыкты, коопсуздукту жана туруктуу өнүгүүнү камсыз кылууга багытталган тышкы саясат жаатындагы конструктивдүү өз ара кызматташуу", — деген Лавров.